Dixebra actúa na Llaboral de Xixón na ‘Nueche del rock asturianu’

El ‘Bailla la Crisis Tour’ de Dixebra torna a Xixón esti vienres pa pesllar la ‘Nueche del rock asturianu’. La banda referencia del rock en llingua asturiana va actuar nel escenariu del patiu de la Llaboral tres Pablo Moro y Dr. Explosion.
 
L’encargáu d’abrir esta ‘Nueche del rock asturianu’ va ser l’uviedín Pablo Moro a les 21 hores. El cantautor, con trés trabayos nel mercáu y una bona acoyida ente’l públicu y la crítica, va llevar les sos composiciones a la Llaboral acompañáu pola so banda habitual, ‘Los chicos listos’. Mentes, a les 22.30 hores, va llegar el turnu de Dr. Explosion, grupu con más de 20 años d’esperiencia bien conocíu fuera y dientro de les nueses llendes. Los xixoneses editaron esti añu’l discu ‘Hablaban con frases hechas’, trabayu de diez temes propios en castellanu y dos versiones: ‘Renacerá’, de Los Brincos, y ‘Blue Monday’, de New Order.
 
El tercer y últimu grupu n’actuar güei na Llaboral va ser Dixebra, a partir de la medianueche. Los avilesinos lleven a Xixón per segunda vegada’l ‘Bailla la Crisis Tour’, xira con paraes en Galicia, Aragón, Castilla o Euskadi que va pesllase, si nun hai novedá, el xueves en Pravia. Cantares vieyos recuperaos y remocicaos, clásicos de siempre y cantares de ‘Amor incendiariu’, el so trabayu últimu, van sonar nun recintu que de xuru va rendise al rock n’asturianu d’esta banda.
 
El preciu de la entrada pa disfrutar de los trés estilos qu’ufre la ‘Nueche del rock asturianu’ ye de 10 euros na puerta. Quince llectores d’Asturies.com van acudir de baldre al conciertu tres ganar la entrada nun concursu entamáu por esta web gracies a la collaboración d’EP Management.