Diego Solís va escribir poemes en direuto per 4 hores nun escaparate nun 'reality poéticu'

|
Cubierta 'Volvemos en 6 minutos' de Diego Solís

L'autor xixonés promociona asina la so obra innovadora 'Volvemos en 6 minutos'.

La oficina de Cuatro Gotes Producciones, que rescampla nel xixonés barriu de L'Arena pol so gran escaparate, va acoyer el primer 'reality poéticu' que s'entama nel país. Ye una iniciativa de Diego Solís, que siguiendo la llinia del so poemariu, va tar firmando llibros y escribiendo poemes inéditos en direuto per cuatro hores, creaciones que van vendese en pack regalu col propiu llibru esta tarde.

Va ser en concreto de 16 a 20 hores, espaciu de tiempu nel que tolos ciudadanos que pasen per delantre de la cristalera van poder ver dende la cai esta aición de Solís. 'Volvemos en 6 minutos' ye un proyeutu qu'axunta poesía, imaxe, soníu y merchandising, un llibru n'asturianu ensin precedentes con diseñu gráficu d'Inés Hevia.

Cada poema acompáñase d'un códigu QR pa poder acceder a un audiu del autor recitándolu. "Anicia’l so camín dende la Televisión del Principáu d’Asturies y con daqué tan clásicu de la cadena como una película de vaqueros que viaxa hasta Les Vegues y el so famosu cartel, anque nesti casu fálase de Corvera, non de Nueva York. TCM, Netflix, HBO…, toa una montonera de plataformes y canales colos qu’esfrutar o fadiar tienen sitiu nesti proyeutu a mou de crítica social con películes y series, como 'La naranxa mecánica', 'Black Mirror' (o espeyu negru) o 'La llamada', ente otres. Pero non sólo eso. Nun mundu dixital onde la televisión va perdiendo fuercia, les apps del móvil garren tamién un papel bien importante na composición de 'Volvemos en 6 minutos', criticando la casi dependencia y la necesidá del so usu por parte de la sociedá en xeneral. Too ello pa rematar…, como casi siempres rematen les canales de televisión: con una pausa publicitaria de continuu que va de 6 minutos en 6 minutos, anque nesti casu la intención seya volver hasta lo eterno, daqué que casi se pue facer colos códigos QR", preséntase la obra.

Coleición Matilde de Soignie

'Volvemos en 6 minutos', financiáu al traviés d'una campaña de micromecenalgu na rede, ye la primer obra de la coleición de poesía de Cuatro Gotes Ediciones. Ésta lleva'l nome de la l'autora avilesina Matilde de Soignie.

 
 
Contador Estadistiques