Día mundial contra l'usu de plaguicides

Güei celébrase nel mundu la Xornada Contra los Plaguicides, una división de la industria químico que mueve una cantidá ablayante de millones pero que, al decir de munchos estudios, supón una amenaza pa la salú y el mediu ambiente. Según esplica Carlos Santamarta, director de la revista Worldwatch n'España, estudios
fechos nos EEUU demuestren que de les 500.000 tonelaes de plaguicides que se gasten al añu naquel país, namás el 1% lega a atacar a los organismos (insectos, fungos etc) a los que s'empobina'l plaguicida, mientres que l'otru 99% marcha espardío pa l'atmósfera, pal suelu y pa los cursos d'agua. Arriendes d'esto, los plaguicides dañen tamién a la fauna del mediu, casu de les abeyes que polinicen les plantes y a insectos y páxaron que faen bien pa les plantaciones.

La falta de respetu en munches plantaciones de los plazos de seguranza que manda'l fabricante del químicu lleva tamién a qu'una parte del productu acabemos consumiéndola los humanos. La priesa por poner les producciones en mercáu o, cenciellamente, la falta de preparación o d'ética
lleva a qu'un consumidor mediu pueda entrar en contactu con más de 10.000 productos pal control de les plagues, de los que bien d'ellos son tósicos y sobre 600 ta demostrao que son causa de cáncanu.

L'usu de los plaguicides n'agricultura espardiose n'acabando la II Guerra Mundial. D'aquella, millones de llitros de DDT contaminaron les plantaciones del mundu, y tuvieron que pasar bien d'años pa que se descubrieren los efectos sobre la salú humana d'aquel primer gran insecticida universal. La llista de productos plaguicides nun cansó d'espoxigar d'entós p'acá, y anguaño les multinacionales del sector (Bayer, Monsanto, Rhone-Poulenc...) comercialicen una bayura de principios activos y específicos que ye perdifícil de controlar. Dende los 90, la UE lleva asoleyando llistes de productos prohibíos que se retiren del mercáu por demostrase que son dañinos, pero la industria munches vegaes sustitúyelos por otros nuevos qu'acaben prohibíendose tamién.

L'emplegu correchu de los plaguicides tamién ye una asignatura pendiente. La llexislación asturiana manda tener una llicencia d'aplicador autorizáu pola Conseyería pa poder sulfatar, pero anque cooperatives y ayuntamientos tan poniendo cursos pa sacar la llicencia, esta llexislación nun s'aplica con rigor, y munchos agricultores, los más d'ellos aficionaos y non-profesionales, empleguen plaguicides ensin xacíu, ensin respetar proporciones nin plazos y tirando a la mínima presencia de fungos o insectos de productos de muncha potencia y espectru d'acción que nun saben emplegar. Tres de la popularización de funxicides y insecticides, l'espardimientu del usu d'otra triba de químicos agrícoles, los herbicides, ye la última moda, y Asturies nun ye ayena a ello. La desapaición del ganao, la perda d'usu del rozu, el gustu estéticu por tener un prau y una sebe "llimpies" y unes agresives campañes de propaganda ficieron que n'Asturies espoxigare enforma la venta d'herbicides, qu'anguaño son ún de los productos estrella en cooperatives agrícoles y cases de xardinería. Ente estos herbicides hai ún que rescampla pol so ésitu comercial, que ye'l "Round Up" de la casa Monsanto, qu qu'asegura que l'herbicida ye biodegradable dafechu y que nun tien efectos secundarios, cosa que contradicen estudios independientes.

Y lo más grave ye que los plaguicides nun son la igua. La presencia de lossulfatos afala la capacidá d'insectos y fungos pa mutar y adaptase, y si la
FAO tenía en 1965 una llista de 182 plagues, en 1977 la cifra yera de 364, llegando anguaño'l censu a más de 500 insectos resistentes a plaguicides y 100 especies de fungos. La mesma FAO reconoz que la medra de les plagues lleva a que se pierda un 13% de la collecha por términu mediu sobre'l 7% que se perdía va 15 años. Ello por nun falar del riesgu pal agricultor, que remana químicos concentraos de muncha peligrosidá.

La instauración d'esti día mundial de los plaguicides celebra'l cabudañu del desastre del 3 d'avientu de 1984, cuando la fábrica de
plaguicides de la empresa Union Carbide en Bhopal (India) soltó a
l'atmósfera 40 tonelaaes de productos químicos que mataron a
20.000 persones no que foi el peor accidente industrial de la hestoria.
La investigación de la xusticia indio descubrió tres años
depués que'l desastre nun fuere un accidente, y que'l responsable de la traxedia fuere'l
director de la compañía, que retirare los sistemes de seguranza. Sicasí, la xusticia de la India nunca nun pudo procesar a Anderson, que vive anguaño nos EEUU, que nun concedieron la estradición. La culpa de la traxedia quedó güérfana al mercar nel 2001 la planta de Bophal la compañía Dow Chemical, que nunca nun quixo aceptar responsabilidá polo que pasare

Les cifres oficiales falen de 2.500
muertos la nueche del desatre y d'ocho mil muertos más n'aquella selmana, contándose en total unes 20.000 v´ctimes mortales y
ente 120.000 y 150.000 enfermos crónicos por culpa del escape tósicu. Unin Carbide indemnizó al Estáu Indiu con 470 millones de dólares, una paga pequeña en comparanza colos 5.000 millones de dólares que recibieron los EEUU pola marea prieto del Exxon Valdez.