Día d’Asturies, pero ¿qué ye Asturies?

Esti xueves, 8 de setiembre, celebramos el Día d’Asturies. Pero, ¿qué ye Asturies? ¿Cómo podríemos a esplicá-ylo a daquién que nun nos conoza? ¿Ye posible resumir lo que somos emplegando un llibru, una obra d'arte o una película? ¿Qué ye lo que meyor nos define o representa como país? Asturies.com, cola collaboración d’espertos en dellos campos, trata de responder esta complexa entruga.

Pa ello punximos en marcha esti esperimentu nel que plantegamos a diferentes persones que nos fixeren les sos propuestes. El llistáu que sigue sal de facer una esbilla d'una primer escoyeta de les mesmes, pero nun busca ser una verdá científica, yá que caún podríemos facer ún diferente. ¿Cuál sería'l tuyu?

Llibru de Ficción:

• 'La balada del norte', d'Alfonso Zapico, una creación lliteraria en formatu cómic mui significativa que trata'l tema noveláu de la Revolución d'Ochobre del 34, un rasgu distintivu mui importante de los asturianos y asturianes que diz muncho de lo que fuimos y siguimos siendo como sociedá.

Otres opciones valoraes: ‘Fontenebrosa: el reinu de los Silentes’, de Vicente García Oliva, y 'Potestas', de Xulio Arbesú.

Llibru de Non Ficción:

• ‘Antigüedades y cosas memorables del Principado de Asturias’, de Luis Alfonso de Carvallo, que, a falta d'una gran historia d'Asturies que ta por escribir, sigue tando presente cuatro sieglos depués y anticipa aspeutos actuales, dalgunos non tan positivos como'l grandonismu.

Otres opciones valoraes: ‘La revolución de mayu de 1808. O l’aniciu de la historia contemporánea d’Asturies', de Faustino Zapico; los escritos de Xovellanos; y 'La nación (im)posible', de Pablo San Martín.

Discu

• 'Asturies, ayeri y güei', de Nuberu, polos cantares tan relevantes qu'inclúi y por suponer un saltu nel Nuevu Canciu Astur.

Otres opciones valoraes: 'Muyeres', de Muyeres; 'Asturcón', d'Asturcón; el cantar 'La pipiona' de Llan de Cubel; y la figura de pareya de gaita y tambor.

Película

• 'Carne de gallina', de Javier Maqua, porque reflexa perbién el calter y l'humor de los asturianos, amás d'amosar una visión actual d'Asturies, una sociedá en decadencia con inxeniu pa salir alantre.

Otres opciones valores: 'Vaca mugiendo entre ruinas', de Ramón Lluís Bande, y 'ReMine, el último movimiento obrero', de Marcos M. Merino.

Paisaxe

• El Monte Aramo, que podía ser considerada la columna vertebral d'Asturies por tar llantáu xusto na so metá. Agospia munchos megalitos y el texu de Bermiego, y como un apendiz tien el Monsacro, onde s'abellugaron reliquies sagraes ástures.

Otres opciones valoraes: Os Teixois, el pasu de L'Altu El Palu a L'Altu La Marta aculumbrando al norte y el llitoral dende El Picu Santana en Cuideiru.

Arte

• 'Recogiendo la manzana', de Nicanor Piñole, cuadro del Muséu de Belles Artes d'Asturies pintáu nel 1922 que representa un mundu que sigue esistiendo y la solidaridá interxeneracional.

Otres opciones valoraes: serie de pizarra de María Jesús Rodríguez (Grupo Abra), el prerrománicu y la pintura d'Evaristo Valle.

Gastronomía

• La sidra, esistente n'otros llugares del mundu, ye más qu'una bébora n'Asturies. Enraigonada na sociedá astruriana, ye una de les señes d'identidá propia más representativa del país y por eso la so cultura ye candidata a Patrimoniu Cultural Inmaterial.

Otres opciones valoraes: les casadielles y la fabada.

Na semeya, gaiteres y gaiteros na Fiesta de la Oficialidá, en Bimenes.