Despidida del Derrame Rock por falta d'apoyu

A la fin el Derrame Rock despídese de los asturianos mañana vienres con un conciertu n'Avilés.

"Esisten un 90 % de posibilidaes de qu'esti conciertu seya la Despidida definitiva del Derrame Rock". D'esta manera tan clara faló sobre'l futuru del Festival a esti diariu uno de los responsables del Derrame Rock y de Santo Grial Producciones. Nos últimos meses los promotores del Derrame salieron a la prensa denunciando la falta de sofitu del Principáu pa con esta iniciativa. En toos estos meses, según los organizadores, nun se punxo en contactu con ellos nengún responsable del Principáu pa intentar llegar a una solución. La organización comentó a Asturies.con que sigue cola puerta abierta a cualquier negociación, anque nun tienen muncho enfotu en que'l Principáu vaya a ponese en contactu con ellos. Poro esti conciertu va ser, si nun cambia muncho la cosa, una auténtica despidida

Cinco grupos van tocar pa dici-y adiós al Festival. Los grupos por orden d'apaición nel conciertu son "Jacky Trap", "Escuela de Odio", "Mala Reputación", "Fe de Ratas" y "Dixebra". Los tres primeros van echar 45 minutos de conciertu, mientres que los dos últimos una hora y hora y cuartu respectivamente. La entrada val 10 euros, y les primeres quinientes entraes lleven de regalu un cd con dos temes d'estudiu de caúna de les bandes qu'actuen esa nueche, amás de dos pistes de cd-rom con imáxenes de les dos últimes ediciones del Derrame. El llugar de la despidida va ser la Sala Quattro d'Avilés y les puertes van abrise a les 20:00 hores pa entamar la música a eso de les 21:00 hores.