Denuncien a Tragsa por nun retirar galipote

La Coordinadora pol Estudiu y la Protección de les Especies Marítimes CEPESMA punxo güei una denuncia a la empresa Tragsa, encargada de la llimpieza de los restos del fuel del Prestige nel xulgáu de L.luarca. la denuncia acusa a la empresa estatal de servicios de nun trabayar la ensenada de Mendía, cerca de la Playa de La Franca, en conceyu de Ribedeva

Los responsables del Cepesma dicen que-yos abulta una irresponsabilidá que depués d'un añu y trés meses del desastre entovía queden llugares en que nun se trabayo, casu d'esti requexu de la Playa La Franca, y ello anque la entidá que dirixe Luis Laria diz que dio avisu bien de vegaes de que fueren a retirar el galipote d'aquella parte. El Cepesma reconoz que se fizo llabor de llimpieza n'Asturies, pero llamenta que toles actuaciones importantes empobínense namás a llugares que tan a la vista y que tienen munchu ganchu pal turismu.

El que la denuncia se faiga en concreto pol abandonu de Mendía ye porque ellí añera una colonia de llóndrigues que tienen una convivencia, difícil a la fuerza, col galipote. El 21 de xineru una d'estes llóndrigues apaeció muerta, y la cantidá de galipote que ta espardío per onde pasen pa metese a los furacos onde viven les llóndrigues da a entender que puen apaecer más