Denominación d'orixe, poco pero bono

Asturies, por increyible que paeza,
namás dos productos asturianos con denominación d'orixe, la faba
y el quesu de cabrales. Estos dos productos, xunta la marca "ternera
Asturiana" son los únicos que tienen sellu de calidá
européu, un distingu que nel Estáu Español tienen un total
de 145 productos.



Anque hasta agora nun hubo una política atrevía de sacar alantre
Denominaciones d'Orixe pa munchos productos asturianos, anque la de la sidra ta
en camín y l'anterior conseyeru Menédez de Luarca comprometiose
tovía esti añu en Grao a sacar alantre la del quesu d'Afuega'l
Pitu. El quesu de Los Beyos tamién ye candidatu a sacar DO, pero el procesu pa llegar a ella ye abegosu y caru, polo que cualquier productu que quiera llegar a ella tien de contar con un mínimu de producción pa que la faiga viable.



Con too y con ello, estos productos con DO mueven un importante volume de
facturación. Asina, el Conseyu Regulador de la DO del quesu Cabrales
atecha a 42 ellaboradores que l'añu pasáu vendieron más de
500.000 kilos de quesu, una cantidá importante, sobremanera si se tien
en cuenta qu'esti quesu namás se fai en dos conceyos del oriente,
colo que'l cabrales conviértese nuna de les fontes d'ingresos más
importantes pal conceyu que-y da'l nome y pa Peñamellera Alta.



Pela so parte, la etiqueta de la DO de la faba asturiana, un productu
más al aldu de los cambeos climáticos y otros condicionantes de
la collecha, acompañó estos dos años últimos a una producción de cerca de 70.000 kilos qu'envasen ente les 20 empreses inscrites nel conseyu, pal que dan la collecha un total de 240 productores de faba.

En cuantes a la IGP de la "Ternera Asturiana", tolos meses salen una media de 900 xatos col sellu d'ella, y bien d'ellos marchen pa la esportación, mientres que p'acabar, el vinu de Cangas, anque nun tien DO, si cuenta dende esti añu con una etiqueta de "Denominación de Vinu de la Tierra" siendo l'últimu hasta agora n'entrar al pequeñu grupu de productos asturianos con dalguna categoría de denominación. De tar a puntu de desapaecer a mediaos del sieglu XX esti vinu remocicó de últimos de los 90 p'acá, esistiendo agora en conceyu de Cangas más de 70 hectaries de viña que bien podríen ser munches más d'equí a poco.