Democratizar la güerta

A semeyanza de lo que yá hai en Xixón dende l'añu pasáu y del modelu que lleva funcionando dende va más de quince años na rodiada de delles grandes ciudaes de países como Francia, l'agrupación del partíu políticu Andecha Astur en Carreño metió de recién una propuesta nel rexistru del Ayuntamientu de Carreño pa que l'Ayuntamientu destine una faza a güertes públiques que se repartiríen ente los xubilaos y la mocedá del conceyu. Como novedá, el proyectu que presenta l'grupación asturianista pidi que nes güertes que se crearen se trabayare con práctiques agrícoles respetuoses col mediu ambiente, evitando la utilización de productos químicos de síntesis nun permitíos nel protocolu de normes de la Agricultura Ecolóxica y pidiendo l'asesoramientu del Conseyu de la Producción Ecolóxica.