Dellos coleutivos van protestar el domingu n’El Remediu contra les llinies d’alta tensión

El domingu, coincidiendo cola cercanía del Día Mundial del Mediu Ambiente, dellos coleutivos conversacionistes y asociaciones vecinales van entamar una aición de protesta n’El Remediu. Van manifestase contra les llinies d’alta tensión.
 
“Celebramos, un año más, el Día Mundial del Medio Ambiente con una aición de denuncia de dalgún de los múltiples fechos qu’a lo llargo del añu foron causa de reivindicación por parte de los coleutivos sociales y que tienen una componente claramente ambiental y ecolóxica”, espliquen los convocantes, que nesti 2012 decidieron centrase “nos impautos de les llinies y subestaciones d’alta tensión”. El Remediu, nel conceyu de Nava, una población afeutada pol pasu de trés llinies d’alta tensión y puntu nel que ta previsto que se faiga l’entronque de la nomada llinia ‘Costa Verde’, foi’l llugar escoyíu poles organizaciones pa facer esta protesta.
 
“Les llinies y subestaciones d’alta tensión son una de les agresiones mayores que sufre l’entornu natural asturianu, pola so estensión y pola cantidad tan numberosa esistente”, señalen estos coleutivos, que recuerden que continúen en marcha dellos proyeutos a lo llargo de tol país: la ‘Costa Verde’ de 400 KV, con salida n’Avilés y final en Samartín; la Lada-Velilla, de 400 KV; la Boimente-Pezós, de 400 KV; La Pereda-Viḷḷallana, de 220 KV; y la Coxersa-Serín, de 132 KV. A elles, hai que sumar delles subestaciones yá en marcha o en proyeutu.
 
Marcha pela zona a partir de les 12.30 hores
 
L’actividá prevista’l domingu n’El Remediu pa conmemorar el Día Mundial del Mediu Ambiente, que se celebra’l 5 de xunu, va principiar a les 12.30 hores nel Campu la Ilesia, cerca del llugar onde ta previsto que se faiga l’entronque de les llinies ‘Costa Verde’ y Soto-Penagos. Alredor de les 13 hores va salir una marcha pel pueblu pa conocer los problemes que viven los vecinos d’El Remediu y ver una panóramica de los tendíos actuales y onde ta previsto que se sitúen los proyeutaos. Por último, va celebrase una xinta nel Campu la Ilesia, polo que los convocantes animen a les persones que s’averen a Nava a llevar dalgo de comida y pasar el día nel llugar en confraternización.
 
Les organizaciones qu’entamen esta xornada reivindicativa son la Coordinadora Ecoloxista d’Asturies, Asociación Asturiana de Amigos de la Naturaleza (ANA), Ecoloxistes n’Aición d’Asturies, Greenpeace, Salternavia, Asociación Medioambiental La Cirigueña, SOS Cuideiru, Asociación Ereba Ecología y Patrimonio, Asociación para la Defensa Jurídica del Medio Ambiente ULEX, Asociación Ultravioleta, Grupo d’Ornitoloxia Mavea, Plataforma para la Defensa de la Cordillera Cantábrica, Asociación Medioambiental Ecos Astures, Asociación para la Conservación y Estudio del Lobo (ASCEL), Amigos del Tejo, Colectivo Ecologista de Avilés y les asociaciones de vecinos d’El Remediu, Serín, Fano, Valdornón, La Madera, Celles, Collao, Bimenes y l’Agrupación de Colectivos Asturianos (ACA).