De los foros al conseyu d'alministración

Los foros d´Internet son mui populares, y atraen l'interés de dellos internautes cuando lo que se fala nel foru ye de daqué tema apasionáu (namái hai que ver el foru d´Asturies.com). Pero la rellación ente los foreros y nesti casu la pasión pola Bolsa va dir más lloñe. Ello ye qu'un garapiellu de xente qu'escribe nun foru d´Internet acaba de conseguir tener un puestu nel Conseyu d´Alministración d´una compañía cotizada na Bolsa de Madrid. Ensin dulda que dende un foru pueden facese munches más coses de les que della xente pensaba.

CAD 25 (Club de Collacios de Dinamia) ye´l nome del grupu de foreros d´un foru d´Invertia.com. Esti foru ñació de la xunta de dellos accionistes de la empresa Dinamia a traviés d´un foru del web financieru Invertia.com. Dinamia ye una de les principales compañíes de Capital Riesgu y amás ye la única que cotiza na Bolsa de Madrid. Al nun ser una de les grandes empreses cotizaes nel parqué madrilanu, los analistes bursátiles nun-y daben muncha atención.

Énte esta falta d´información los accionistes asumieron el papel d´analistes y entamaron a trabayar como un grupu d´analís que reparte'l llabor de manera que caún de los miembros de CAD25 analiza dalguna empresa na que participe Dinamia, faciendo estudios que s'aprecien bastante. A travíes del foru ficieron una única voz na Xunta Xeneral d´Accionistes de Dinamia pa tener más fuercia, y el casu ye que yá tienen más del 6% del capital de la empresa colo que tienen el poder por exemplu de solicitar la convocatoria d´una Xunta Xeneral d´Accionistes. Pero la idega de CAD25 va más lloñe, y pasa per influir na estratexa de la compañía, faciendo cada poco recomendaciones a los directivos de la empresa cotizada. Al principiu la Dirección de Dinamia refugaba de les sos peticiones, pero col tiempu el porcentaxe del capital social d´esti grupu de ciberinversores medró asgaya hasta´l puntu que güei los directivos ufiertáron-yos algamar representación nel Conseyu d´Alministración de la empresa.

Estos ciberinversores son yá más de 200 accionistes de Dinamia con un capital mediu caún alrodiu los 36.000 euros, calculándose que tienen anguaño ente toos el 7,25% del capital social, unes 620.921 aiciones. La mayoría d´estos accionistes asistíense na zona de Valencia. Dende´l 2001 esti grupu mantien reuniones con los xestores de la empresa, reuniones onde estos accionistes fain les sos recomendaciones, entrugues y propuestes. Ente les revindicaciones señeres de CAD25 destaca la d´algamar representación nel Conseyu d´Alministración, reivindicación refugada polos directivos de Dinamia hasta agora. Con esti fechu hestóricu, estos accionistes van pasar de ciberinversores a tener un ciberconseyeru nel Conseyu d´Alministración.