De la Revuelta a la Marea cola Raitana

"De la Revuelta a la Marea" ye'l títulu del discu de la banda de gaites "La Raitana", editáu por "Fono Astur" y que ta acabante de salir. La banda de gaites "La Raitana" ta dirixida pol gaiteru Flavio R. Benito, y ta formada por alumnos de los cursos de gaita y percusión de los conceyos de Nava y Piloña. El discu, que ya podéis mercar na nuestra tienda, ye una forma de presentar la música de les bandes de gaites fuera del modelu habitual, nel que normalmente namás que sentimos les gaites y la percusión. Siguen un estilu asemeyáu al de la banda "Llacín" col so "Tornallás", anque nel "De la Revuelta a la Marea" hai más pieces del estilu clásicu de les bandes de gaites. A la banda acompàñenla en dellos temes guitarres, secciones de metales, teclaos, tamién collaboró'l grupu de percusión "Tocándar" de Portugal y la Coral Polifónica Piloñesa. La producción musical ficiéronla Jordi F. Bolta y el propiu Flavio, les más de les pieces grabáronse en direuto nel muséu de la sidra de Nava, el restu de pieces nos estudios "La Factoria" de Piedras Blancas.