De la FSA al Club de Tenis

Esta selmana, el buscador de webs asturianes úlos? presenta, ente les sos nueves entrades, esta páxina con la llista entera d'espacios protexíos n'Asturies, una caxigalina interesante que forma parte d'un web muncho más grande pero que mereció entrar al buscador por nun haber otra qu'apurriere esta información. Xunto con esta fueya, entren tamién webs de característiques tan deseparaes como'l de l'agrupación socialista de Mieres o'l del Club de Tenis de Xixón. L'Archivu d'Indianos de Colombres, que s'estrena na rede, ye otra entrada curiosa. Ente los webs personales, hai que falar d'esta páxina sobre pesca con títulu bien espresivu: "la sacadera". Na estaya de negocios lo más curioso ye esti web de venta de coches de segunda mano qu'enxerta les ufiertes de bien de concesionarios y particulares d'Asturies.Dar d'alta un web nel Úlos? ye bien cenciello. Namás hai que rellenar esti formulariu y mandalu per corréu electrónicu. Lo único que se pide ye que se dean d'alta namás que webs de temática rellacionada con Asturies o fechos n'Asturies.