'D'ayeri a güei' algama un 8,6 por cientu de cuota de pantalla na so estrena

La media de TPA en setiembre foi del 7,6.

La serie documental sobre la música asturiana de los 150 años últimos ellaborada por Goxe Producciones, 'D'ayeri a güei', tuvo una bona estrena anueche, algamando una cuota de pantalla del 8,6 por cientu. Hasta 61.000 persones llegaron a coincidir frente a la pantalla pa siguir el primer de los cincos programes que la componen, con una audiencia media de 23.000.

Estos datos tornen a asitiar los conteníos n'asturianu y sobre cultura asturiana perriba de la media de la canal. En setiembre, ésta foi del 7,6 por cientu.

Otra manera, los informativos tornen a confirmase como los espacios más vistos de TPA. El de la nueche algamó una cuota de pantalla del 21,3 por cientu, la más alta d'esta temporada.