David Ferrer va repetir participación en Lluanco

El tenista valencianu David Ferrer va ser, otra vuelta, la estrella de XXXII Tornéu Banco Herrero-Tenis Playa de Lluanco, qu’esti añu va celebrase del 27 al 30 de xunetu n’horariu de tarde-nueche. N’actualidá, Ferrer ocupa’l númberu 6 del ranking ATP.
 
Con esta participación, el de Xàbia va sumar tres ediciones siguíes del tornéu únicu nel mundu que tien el sable de la playa como superficie de xuegu. Ferrer foi campeón na edición del 2009 tres vencer a Guillermo Cañas nuna final marcada pola lluvia qu’obligó a disputar el partíu a 10 xuegos y l’añu pasáu viose superáu nel partíu decisivu por Nicolás Almagro por un 6-4 y 7-6 (7-5) ante 2.100 espectadores. El comité organizador del tornéu destacó, nun comunicáu, “la escelente disposición del xugador” pa repetir na playa La Ribera y aseguró que la so presencia “garantiza un añu más un nivel deportivu altísimu”.
 
Esta temporada, Ferrer ta mostrando un bon nivel de xuegu, como pudo comprobase nel Open d’Australia, onde llegó a semifinales tres eliminar en cuartos de final al númberu 1 del mundu, Rafa Nadal. El británicu Andy Murray, que perdiera la final depués contra Djokovic, foi quién frenó les esperances del valencianu al superalu por 4-6, 7-6, 6-1 y 7-6. A la so actuación escelente en Melbourne hai que sumar el trunfu nel tornéu d’Auckland, onde derrotó na final a David Nalbandian por 6-3 y 6-2.