Cursos del IDEPA

La Escuela de Negocios d´Asturies ta faciendo unes xornaes sobre les nueves estratexes y modelos de xestión de los Recursos Humanos. Nestes actividaes collabora l´Asociación Española de Dirección de Personal, qu'amás tien sede nes instalaciones de la Escuela de Negocios d´Asturies. Sofiten tamién esta selmana pa directivos l'Ayuntamientu de Xixón y el Principáu. Estes xornaes tan dientro de la primer Escuela de Veranu de la Fundación Escuela de Negocios d´Asturies, qu'entamó ya en Xunetu con unes xornaes sobre´l Mediu Ambiente.

La selmana entamó cola conferencia del martes "Nueves tendencies na xestión de los recursos humanos" y tien por llema "la persona, activu principal de la empresa" . Ente los temes que van tratase destaquen l'analís sobre´l futuru de la xestión de personal, les nueves tecnoloxíes nos procesos de selección de personal, los nuevos modelos de xestión y les estratexes aplicaes a los departamentos de rrhh de les empreses.

Otramiente, l´Institutu de Desarrollu d´Asturies (IDEPA) dio anuncia del entamu de dos nuevos cursos: el d´Auditores de Sistemes de la Calidá y el d´Auditores de Sistemes de Xestión Mediuambiental. El primer cursu va entamar el próximu 29 d´esti mes mentantu que´l d´Auditor Mediu Ambiental va tener aniciu'l 6 d'ochobre. Estos dos cursos van impartise nes instalaciones que tien l'IDEPA nel Parque Tecnolóxicu d´Asturies en Llanera. Na organización de los cursos participen tanto l'IDEPA como l´Asociación Española de Normalización y Certificación (AENOR), mientres que nel cursu d´Auditores de Sistemes de Calidá tamién tan na organización el Ministeriu de Ciencia y Tecnoloxía y el de Defensa. Los cursos tienen una duración de cuarenta hores y tan dirixíos a profesionales rellacionaos cola auditoría técnica.