Cultura, Política Llingüística y Deporte pasen a depender de Barbón con una viceconseyería a cargu de Vanessa Gutiérrez

“Nestos momentos énte la fola d’involución que tamos viviendo y dada la tresversalidá de lo que supón la política cultural, tomé la decisión de que les polítiques de Cultura, Política Llingüística y Deporte dependan direutamente de la Presidencia”, apuntó'l reelixíu Adrián Barbón na anuncia del so Gobiernu nuevu. La escritora mierense Ana Vanessa Gutiérrez va tar al frente de la viceconseyería que les xestione.

Ésta foi la principal novedá de la composición del Gobiernu d’Asturies de coalición qu’anunció’l socialista'l sábadu na sede de Presidencia, que sigue conformáu por diez conseyeríes, cola reestructuración d’estes árees dependientes de la Conseyería de Cultura, Política Llingüística y Turismu que llevó Berta Piñán na actual, y ye paritariu. La vicepresidenta Gimena Llamedo va encargase de les polítiques de turismu na Conseyería de Presidencia, Retu Demográficu, Igualdá y Turismu.

Asina, Cultura, Política Llingüística y Deporte pasen a depender direutamente de Barbón, con una vicenconseyería de la que va ser responsable Gutiérrez, reconocida escritora en llingua asturiana nacida n'Urbiés nel 1980 que foi xefa de gabinete de Piñán estos años. Un movimientu del llavianés que ta siendo bien recibíu dende instituciones y coleutivos en defensa del idioma, a la espera de que se tresforme en fechos, sobre manera no que respeuta a la tresversalidá de la normalización llingüística.

El restu del Executivu

Les otres conseyeríes que conformen el Gobiernu nuevu del país son les de Facienda y Fondos Europeos, con Guillermo Peláez Álvarez al frente; Ciencia, Empreses, Formación y Emplegu, con Borja Sánchez García; Salú, con Concepción Saavedra; Educación, con Lydia Espina; Transición Ecolóxica, Industria y Desendolcu Económicu, con Nieves Roqueñí; Fomentu, Cooperación Llocal y Prevención de Quemes, con Alejandro Calvo; Mediu Rural y Política Agraria, con Marcelino Marcos; y Derechos Sociales y Bienestar, con Melania Álvarez García. Complétase cola d’Ordenación del Territoriu, Urbanismu, Vivienda y Derechos Ciudadanos, con Ovidio Zapico como conseyeru llueu del alcuerdu de gobiernu ente la Federación Socialista Asturiana (FSA-PSOE) y Convocatoria por Asturies (Izquierda Xunida-Más País-Izquierda Asturiana).

D'ellos, namás cuatro siguen de la llexislatura última: Sánchez García, Calvo, Álvarez García y Espina. La renovación del estáu de bienestar, el crecimientu económicu, la creación d'emplegu de calidá y l'impulsu demográficu son dalgunos de los grandes oxetivos que Barbón marcó pa esti mandatu.