Cultura aumenta les ayudes pa la rehabilitación d’horros y pa la difusión del patrimoniu asturianu

La convocatoria del 2024 de les ayudes pa la rehabilitación y conservación d’horros, paneres y cabazos, y a la difusión, estudiu y fomentu del valor del patrimoniu cultural asturianu, aumenta les sos dotaciones. La Viceconseyería de Cultura, Política Llingüística y Turismu dedica 100.000 euros más a la primera y 20.000 a la segunda.

Hasta’l 12 de febreru tienen pa presentar los sos proyeutos los propietarios d’horros, paneres y cabazos, asina como d’otros elementos d’interés etnográficu, que cuenten con un nivel de proteición integral nos catálogos urbanísticos municipales aprobaos con posterioridá a la entrada a valir de la Llei de Patrimoniu Cultural del 2001 y, nel casu de que’l conceyu nun disponga d’ún, los de bienes muebles anteriores al 1940 que constituyan “muestres notables pola so talla, decoración, carauterístiques constructives o por formar conxuntos”. Nun van poder tener accesu a les ayudes aquellos elementos que sían BIC (Bien d’Interés Cultural) o los que formen parte del Inventariu del Patrimoniu Cultural d’Asturies.

La dotación d’esta convocatoria ye de 450.000 euros, lo que supón 100.000 más que nel 2023, cuando la partida foi de 350.000 euros, mentes que la cuantía máxima por proyeutu caltiénse en 7.500 euros y nun se van subvencionar actuaciones perriba del 75 por cientu del presupuestu subvencionable. Estes ayudes formen parte del Plan del Horru, qu’inclúi una batería de midíes pa promover l’ameyoramientu na conservación y rehabilitación d’estos elementos de valor patrimonial y etnográficu.

De 80.000 a 100.000 euros

Les ayudes a la difusión, estudiu y fomentu del valor del patrimoniu cultural asturianu medren mentes en 20.000 euros, pasando de 80.000 a 100.000 euros. El plazu nesti casu pa presentar proyeutos va tar abiertu hasta’l 6 de febreru, cola posibilidá de recibir un máximu de 6.000 euros por caún.

La convocatoria inclúi cuatro llinies específiques de financiación en función del beneficiariu: entidades ensin ánimu d’arriquecimientu y particulares pa la puesta en valor del patrimoniu cultural material o pa la puesta en valor del patrimoniu cultural inmaterial y archivos de tradición oral, per un llau, y los mesmos conceptos pa empreses, pel otru. Amás d’apoyar estes aiciones y potenciar l’actividá d’asociaciones, fundaciones y otres entidaes que tengan como razón de ser la defensa y promoción del patrimoniu cultural asturianu, la finalidá de les subvenciones ye fomentar el conocimientu de los valores culturales per aciu de proyeutos que propicien l’aprendizaxe, la promoción y la difusión del patrimoniu ente la ciudadanía.