Cuéllar y Muñiz zarren la renovación col Sporting

|

Conviértense nos dos primer refuerzos pal proyeutu 2015-2016 en Primera.

El guardameta, ún de los xugadores roxiblancos más pretendidos por otros clubes tres quedar llibre depués d'algamar el 'Zamora' de Segunda División, va continuar nel Sporting per trés años más, cola opción d'amplialo a un cuartu según oxetivos. D'esta forma Cuéllar, que llegó a Mareo na temporada 2008-2009 procedente del Atlético –tres una cesión nel Eibar–va competir pola titularidá con Alberto.

Otru xugador que va continuar nes files xixoneses ye Juan Muñiz, que firma tamién per trés temporaes. El canteranu nun consiguió asentase nel once titular d'Abelardo tres tornar d'una cesión nel Mirandés con poco ésitu, pero sí sumó minutos saliendo dende'l bancu, anotando inclusive 3 goles. La so escelente zurda ye un puntu a favor del xixonés, que cumplió en marzu los 23 años.

Tres estes dos primeres renovaciones, el club sigue trabayando n'atar a Sergio Álvarez, ún de les mayores promeses de Mareo, que cuenta con ufiertes d'otros clubes de Primera División y d'otres lligues punteres. Rachid y Hugo Fraile son los otros dos futbolistes qu'acaben contratu colos que cuenta'l cuerpu téunicu y colos que negocia'l Sporting. Mentes, Iván Hernández medita la so retirada y Álex Serrano firmó pol Espanyol pa xugar nel so filial.

Contador Estadistiques