CSI, CGT y SUATEA salen a la cai pa protestar contra la reforma llaboral, los recortes y los ataques del capital

Na tarde del xueves, en Xixón, ta convocada una manifestación por parte de los sindicatos CSI, CGT y SUATEA pa protestar contra la reforma llaboral, los recortes y los ataques del capital. UXT posiciónase en contra d’esta movilización.
 
Baxo’l lema ‘Esto ye un atracu’ y ‘Nun ye una crisis, ye una estafa’, estos trés sindicatos van a salir a la cai esta tarde, a partir de les 19.30 hores. “La realidá fala por sí mesma. Bien ceo vamos algamar 100.000 paraos y paraes n’Asturies y 6 millones nel conxuntu l’Estáu español. Un millón y mediu de families, 35.000 d’élles asturianes, tienen a tolos sos miembros en paru; más de la metada de los y les pensionistes cobren menos de 600 euros; el 50 por cientu de la mocedá ta nel paru; medio millón de families perdieren yá les sos viviendes y una de cada cuatru persones –el 25 por cientu la población– anda a la raya la probitú”, enumeren nun comunicáu robláu pola CSI. Pese a esta situación, les agrupaciones convocantes recuerden que “el Gobiernu del Estáu español lleva espetaos unos 240.000 millones d’euros en bancos privaos y caxes, la banca privada algama los sos mayores beneficios nos caberos 15 años, el fraude fiscal de les grandes fortunes ye de 80.000 millones d’euros añales, la economía somorguiada mueve cuásique 250.000 millones d’euros, la Xunión Europea lleva gastaos 400.000 millones d’euros en rescatar a la banca privada y nos paraísos fiscales hai depositaos 6 billones d’euros”.
 
A ello hai que sumar “les sucesives reformes llaborales, los recortes sociales y les privatizaciones”, que nun faen otra cosa que “xorrecer el paru y tornar el drechu a la Salú, la Educación y los Servicios Sociales nun privilexu al que namás van poder aceder aquellos que puedan pagalu”. Los sindicatos tamién faen referencia a los partíos parllamentarios y la so actitú, que lleva a una convocatoria d’eleiciones anticipada. “Los sos únicos intereses son partidistes y personales”, afirmen los convocantes de la manifestación que va partir de L’Humedal. “Les coses sólo van camudar cuando los y les trabayadores entamemos un camín de movilización y de defensa de los nuesos drechos na cai y nos centros de trabayu, con tolos medios que tengamos al nuesu alcance”, finaliza’l comunicáu. Otra manera, hai que destacar qu'esta manifestación tien el sofitu de Bloque por Asturies-Unidá Nacionalista Asturiana (UNA), según confirmó la coalición nacionalista.
 
Les crítiques de Gutiérrez Braga
 
La convocatoria de la protesta prevista pa güei en Xixón nun-y presta a Justo Rodríguez Braga, secretariu xeneral d’UXT nel país. La marcha celebrada’l 26 de xineru n’Uviéu pol movimientu 15-M contra l’actitú de los dirixentes de los dos sindicatos mayoritarios, UXT y CC OO, ante los recortes a los trabayadores ye la razón que lleva a Rodríguez Braga a censurar a los minoritarios por tar cambiando “l’orixe del problema”.