Crisis nuna cabecera histórica

El periódicu La Voz de Asturias, ún de los tres diarios en papel que s'editen nel país y tamién una de les cabeceres históriques de la prensa asturiana, con más d'ochenta años d'historia, podría vese nuna situación abegosa si llegar lleguen a tomase les decisiones radicales que tan previstes pa la xunta que'l grupu Z va tener esti vienres.

Según pudo sabese, los directivos del grupu Z, patrones del periódicu asturianu dende 1.986, tienen pensao entamar un recorte de plantilla de 259 trabayadores nos trece periódicos que tien el grupu per tol estáu. Según la información adelantada por Periodista Digital y ampliada ayeri pol confidencial d'internet PR Noticias, venti de los 259 despidos del plan tóquen-y a La Voz de Asturias, que según denunció'l sindicatu CCOO, lleva de va años p'acá destruyendo progresivamente puestos de trabayu.

Fundada en 1923 por iniciativa del industrial José Tartiere, La Voz de Asturias enxertose en 1.986 nel Grupu Z. Yá d'aquella prodúxose un vaciu editorial que-y quitó parte del so públicu tradicional, viniendo darreu d'ello la fuerte espansión de La Nueva España, qu'arrampuñó con parte de los llectores de La Voz, sobremanera nes cuenques mineres. Anguaño, La Voz tien un promediu de tirada en papel de 19.400 exemplares diarios, por 30.000 de El Comercio y 67.000 de La Nueva España.