Crisis na escuela rural

El sindicatu d'educación SUATEA denunció ayeri nun comunicáu oficial la intencion que ven na Viceconseyería d'Educación de quere desaniciar el modelu educativu del mediu rural asturianu. Al dicir de SUATEA, l'organismu oficial ta apretándo-yos, al través del Serviciu d'Inspección, a les families de les zones rurales pa meter a los rapacinos n'escueles de concentración o, en dellos casos, n'escueles concertaes. Según el sindicatu, solamente nos conceyos de la cuenca del Caudal, nos qu'hai hasta 5 Centros Rurales Agrupaos (CRAS), el personal del serviciu d'inspección ta trabayando de tapao, y, ensin el conocimientu de la dirección de los CRA, ta falando directamente coles families pa pinta-yos les hipotétiques ventayes de los centros de concentración y concertaos y l'hipotéticu fracasu de la escolarización nel mediu rural.

Al paecer de Suatea, esta actividá enxértase nun intentu d'acabar cola enseñanza rural que repercute primero en consecuencies llaborales cola perda de puestos de trabayu directos y na mengua de la calidá del trabayu al afalase la matriculación en centros concertaos, pero entovía-y abulta más grave l'apueste que supón esta política por afalar al abandonu del mediu rural, que pierde asina un serviciu públicu básicu y gana un argumento en favor del abandonu de los pueblos. El sindicatu acaba diciendo que la politica educativa del Principáu parez que pasa per destrozar tola identidá cultural y territorial asturiana, y ye asina qu'un instrumentu pa ello ye atacar al derechu a recibir educación ensin que se discrimine a naide por razón del llugar de residencia, que ye lo que taría faciéndose. Suatea esplica que pa garantizar esi derechu esisten munches soluciones distintes, y qu'hai bien d'elles que tan ensin esplorar.