Crisis ente sindicatos d'enseñanza y Educación

Los sindicatos de la enseñanza CCOO y Suatea anunciaron ayeri en comunicáu conxuntu qu'abandonaben la mesa sectorial de negociación cola alministración asturiana depués de decatase de la "falta de voluntá" d'esta a tratar asuntos a los que ta obligada por llei, refiriéndose a los mayestros interinos, qu'ayeri protagonizaron una manifestación pel centru d'Uviéu.

CCOO y Suatea denuncien que la Viceconseyería d'educación quier aplicar un modelu de rotación permanente de les llistes d'interinos, lo que vien a suponer que nun se-y va dar garantía nenguna d'estabilidá llaboral a esti colectivu, qu'amás tien la obligación de volver a presentase a les oposiciones cada vegada que se convoquen pa defender la plaza. Otramiente, los sindicatos tampoco nun tan d'alcuerdu con que la Viceconseyería reculare nel tema de da-yos a los centros autonomía pa diseñar la xornada lectiva. Afondando nesti particular, dambos sindicatos ven mui grave que la Viceconseyería diga que va atender les peticiones de dellos centros, en cuantes que-yos abulta dexar un puerte abiertu al aldu del favoritismu.

Estos dos puntos de desalcuerdu y tamién l'actitú de la Viceconseyería llevaron a CCOO y Suatea a dexar la mesa de negociación. El tercer de los grandes sindicatos d'enseñanza asturianos, FETE-UGT, va dar güei la so postura sobre esti asuntu en rueda de prensa.