Corriente verde

"Saber pa poder escoyer" Esti ye'l
lema d'una campaña conxunta d'organizaciones ecoloxistes, de
consumidores y sindicales, ente elles Greenpeace, Adena, UXT y CCOO que piden que les compañíes pongan nos
recibos de que fontes d'enerxía vien la corriente que gastamos y
qué efectos contaminantes tien, una indicación que bien
podía ayudar a escoyer que compañía queremos que nos dea
serviciu, o polo menos a conocer les emisiones de CO2 de les que ye responsable
esa empresa. La campaña encóntase na esistencia d'una directiva europea del 1 de xunu que manda a les compañíes poner en recibu'l desglose de fontes emplegaes en dar suministru.



Pela so parte, Electra del Carbayín, la empresa asturiana que vende
corriente producío dafechu con enerxíes renovables, fai balance
de los primeros meses de mercáu eléctricu lliberalizáu,
nel que cada consumidor pue escoyer el suministru de la compañía
que-y abulte más conveniente por preciu o por serviciu. Nesti primer
añu, nel que mui poca xente ta cambiando de compañía, ente
otros motivos porque nun hai muncha diferiencia de preciu ente compañíes y amás nun ta faciéndose propaganda d'ello, la empresa de
Siero diz que ta cubriendo les espectatives que tenía.

Electra diz que de xineru p'acá consiguieron facer
cerca de 150 clientes nuevos, lo que ye muncho pa una empresa qu'atiende un total de cerca de 4.000 clientes. Per otra parte, dende que se lliberalizó'l mercáu eléctricu, namás 3.000 clientes en tol Estáu español decidieron camudar de compañía, lo que quier dicir qu'Electra acapara cerca del 5% del baille de contadores. Llama l'atención que los más de los clientes nuevos d'Electra nun tean n'Asturies, y ye que, según espliquen ellos mesmos, tan llegándo-yos clientes de Cantabria, Valencia y, sobremanera, Cataluña, que ye onde más tan afuracando pel mercáu y onde hai un públicu más receptivu a la cuestión de la corriente verde.