Corquiéu llevóse dos Premios AMAS: meyor discu y meyor cantar folk

El vienres pasáu celebróse nel Teatru Filarmónica la VI Gala d’Entrega de los Premios AMAS, onde Corquiéu y Avalanch foron los más destacaos al llevase dos galardones ca ún. Los de Ribeseya ganaron los premios al meyor discu y cantar folk.
 
El discu ‘Suaña’, de Corquiéu, foi’l gran protagonista de la VI Gala d’Entrega de los Premios AMAS al llevase dos galardones, númberu que namái igualó’l grupu ‘heavy’ Avalanch tres llevase los premios al meyor cantar rock, por ‘El hombre solo’, y al meyor videoclip, por ‘Mil motivos’. Los riosellanos lleváronse los galardones al meyor discu folk y al meyor cantar pol tema ‘Bratislava’. Un ésitu nuevu de Corquiéu, que tamién ta nomináu a los XV Premios de la Música na categoría ‘Meyor cantar n’asturianu’ pol tema ‘I&C’.
 
Nel resto de les 20 categoríes, destacaron los galardones que recibieron Anabel Santiago (meyor voz), Héctor Braga (otros instrumentos), Jorge Suárez Carbajal (gaita), Mala Reputación (direutu), Skontra (portada y diseñu por ‘Mazcando miseries’, obra del gaiteru Alfonso Zapico), Skama la Rede (discu rock por ‘Ye too mentira’), ente otros. Los AMAS honoríficos d’esta edición foron pa l’artesanu constructor de gaites Alberto Fernández Velasco, el cantante Víctor Manuel y pal festival Derrame Rock. Otra manera, la gala contó coles actuaciones de Xera, Muñeco Vudú y el dúu Turienzo y Vaudí.