Convocaes les ayudes a la edición y a medios

Son les primeres llinies de subvención que Política Llingüística espubliza esti añu.

La conseyería convocó les ayudes a la promoción del llibru n’asturianu y en gallego-asturiano, y a medios de comunicación pa la normalización social de dambes llingües. Les cantidaes anunciaes pa dambos conceptos nun sufren modificaciones con respeuto al presupuestu aprobáu: 90.000  y 100.000 euros, de manera respeutiva.

Quedaríen pendiente por asoleyar les de producción musical, a les que se destinen 20.000 euros, y la d'entidaes llocales, un total de 50.000 euros. Toles partíes son les mesmes que les que destinó l'anterior Gobiernu, presidíu pol tamién socialista Javier Fernández, a esceición de la del llibru, que sufre una rebaxa de 10.000 euros.

Na imaxe, la conseyera de Cultura, Política Llingüística y Turismu, Berta Piñán, y el presidente Adrián Barbón atienden a les esplicaciones d'Alfonso Palacio, direutor del Muséu de Belles Artes, na inauguración de la esposición ‘Orlando Pelayo, exiliu y memoria’. Semeya obra d'Armando Álvarez.