Confírmase l’ausencia del asturianu na etapa d'Educación Infantil

|
Lydia Espina y David Artime currículu Infantil y Primaria

La Conseyería d’Educación presentó esti xueves el desendolcu curricular d’Infantil y Primaria adaptáu a la LOMLOE, que se va aplicar dende’l cursu viniente. Confírmase l’ausencia del asturianu na primer etapa, mentes que dende los 6 años sigue como optativa xunto con Cultura Asturiana col mesmu númberu d’hores llectives.

Los currículos, anguaño en tramitación, básense nel desenvolvimientu fechu pol Ministeriu d’Educación y Formación Profesional y faen usu del marxe autonómicu que dexa la Llei Orgánica 3/2020, de 29 d’avientu, pola que se modifica la LOE del 2006 (LOMLOE). El Gobiernu apuesta por un enfoque tresversal de la coeducación, polo qu’a partir de Primaria los centros van poder agrupar les materies por ámbitos, en cuenta d’impartiles una a una, y han dedicar, lo menos, el 20 por cientu del horariu al trabayu por proyeutos.

N’Educación Infantil el currículu inclúi pela primer vez los dos ciclos, de 0 a 3 y de 3 a 6 años, cola mira de sintonizar el deprendimientu, garantizar la continuidá y da-y identidá propia. Caltiénse la distribución de los conteníos en trés árees, que conserven la esencia, pero que modifiquen la denominación y pasen a llamase ‘Descubrir, disfrutar y esplorar l’entornu’, ‘Comunicar y representar la realidá’ y ‘Medrar n’harmonía.

La Llingua Asturiana y el Gallego-asturiano, como se comunicara en febreru, nun tien presencia nesta etapa, na que va potenciase l’enseñu del inglés. Sicasí, Educación anuncia’l refuerciu de la enseñanza de la cultura asturiana introduciendo elementos tresversales que tengan en cuenta’l contestu onde ta inmersu l’alumnáu.

A escoyer

En Primaria apuéstase pola tresversalidá de conteníos y por avanza nel deprendimientu por competencies. Afítense 8 claves pa esta etapa y les asignatures pasen a llamase árees, decretando un total de 8: Ciencies de la Naturaleza, Ciencies Sociales, Educación Física, Educación Artística, Llingua Castellana y Lliteratura, Llingua Estranxera, Matemátiques y Educación en Valores Cívicos y Éticos (namái en sestu cursu).

Les llingües propies van siguir contando con 3 hores selmanales, compitiendo con Cultura Asturiana. D’esta forma, la presencia del asturianu y del gallego-asturiano nun camuda con respeuto a la situación actual.

Otra manera, l’alumnáu tamién va tener qu’escoyer ente Relixón y Atención Educativa. La primera sigue contando con 2 hores, pero les sos calificaciones nun van cuntar nes convocatories que se resuelvan cola nota del espediente académicu y va dexar de tener asignatura espeyu.

Na semeya, la conseyera d'Educación, Lydia Espina, y el direutor xeneral d’Ordenación, Evaluación y Equidá Educativa, David Artime, momentos enantes de presentar los currículos na sede de la conseyería.

Contador Estadistiques