Confirmada la validez del documentu que reforma la redacción del alcuerdu de gobiernu

La mañana del martes 7 d'ochobre llegó a la redacción d'Asturies.com la copia d'un documentu con una redacción alternativa a la que se conocía del pautu de gobiernu ente IX-BPA y la FSA-PSOE. En recibiendo'l documentu, l'equipu de redacción d'Asturies.com entamó un llabor
d'investigación pa certificar la veracidá o falsedá d'esti documentu, contactando con representantes de toles organizaciones firmantes del alcuerdu. Los
primeros contactos telefónicos nun permitieron sacar nada en claro,
en cuantes que los representantes políticos que se contactaron dieron toos
versiones contradictories, anque pocos foron los que descartaron dafechu la
esistencia de posibles cambeos sobre l'alcuerdu de
gobiernu que se ficiere públicu'l 2 de xunetu.

Por fin, esta mañana, la Secretaría del Conseyeru de Xusticia, n'esplicandose-yos qu'Asturies.com disponía d'un documentu cola redacción del alcuerdu cambiada, unvió un fax cola versión definitiva del testu a
oxetu de que comparala cola que taba en poder d'esti
diariu. En recibiendo esta copia, comparáronse dambos documentos, que resutaron ser calcaos, colo que yá nun quedó dulda sobre l'autenticidá d'esta nueva y inédita versión del testu del alcuerdu de gobiernu.

Agora queda por saber por qué se
ficieron estos cambeos, que namás afecten a los puntos rellacionaos cola llingua asturiana y, sobremanera, por qué nunca nun se ficieron públicos.

Ufiertamos-yos a los
nuestros llectores los documentos coles tres páxines del alcuerdu real
de gobiernu ente IX-BPA y FSA-PSOE. Los tres documentos d'imaxe (
páxina1,
páxina 2 y
páxina 3) son
escaneos de la versión definitiva del pautu de gobiernu que llegó
a la nuestra redacción, y los puntos en qu'hai diferiencies cola
redacción que tolos asturianos y asturianes conocíemos tan
marcaos en mariello. La redacción que se conocía hasta agora del alcuerdu
yera la que pue lleese nesti
documentu, qu'Asturies.com tien na rede dende'l mes de xunetu.