Concrétase la inversión de HC en Ribera

El calor, que ta escosando los ventiladores y aparatos d'aire acondicionao de los supermercaos asturianos, ye responsable, anque namás en parte, del descomanáu gastu de corriente qu'hai estos díes. Según declaró'l presidente de Rede Eléctrica d'España, el consumu nel estáue xubió un un 16,6% nesti mes d'agostu sobre'l de xunetu, mientres que en comparanza con agostu del 2.002, la xuba foi del 9%

Calor aparte, el gastu de corriente lleva espoxigando ensin aparar en nengún momentu dende va más de dos años p'acá, confirmando les espectatives de les compañíes eléctriques de facer una riestra de centrales térmiques nueves, bien d'elles n'Asturies. Ello ye que una d'elles, la nueva central de Sotu Ribera qu'Hidrocantábrico lleva anunciando dende l'añu pasáu, parez que va garrando forma. Según diz güei La Gaceta de los Negocios, la central nueva de HC ta namás pendiente de pasar l'espediente d'impactu mediuambiental, que la compañía tien entovía por presentar. el diariu económicu descubre más datos sobre la central, que precisaría d'una inversión de 312.2 millones d'euros y que ta pensada pa tener dos grupos de ciclu combináu de 400 MW de potencia caún .

Xunta esta noticia, al otru llau del cordal tamién hai planes pa nueves centrales térmiques, y ye que la empresa catalana Global 3 declaró güei la intención que tien de poner un grupu de ciclu combináu, esti de 252 MW, nel conceyu de Congosto, na comarca de El Bierzo.