Conciertos per San Patriciu

De va unos años p'acá esta fiesta irlandesa convirtióse n'Asturies nuna bona escusa pa entamar conciertos de folk, Xixón ye un exemplu d'ello.

Dos chigres "folkis" de Xixón tienen preparaos pa esta nueche conciertos de folk que van facer qu'esti miércoles día 17 nun seya como los otros. Nel Café Trisquel, a eso de les 21:30 hores, van actuar los veteranos "Merlín". Esti grupu y la so filosofía del folk ñacieron va más de venti años nuna Asturies qu'entamaba a sentir a grupos como "Gwendal" , "Milladoiro" , "The Chieftains" o "Alan Stivell". Baxo aquella influencia a entamaron a tocar xuntos dellos músicos qu'al poco formaríen "Merlín", ente aquellos músicos tan Daniel García de la Cuesta (vigulineru de Lliberdón), Lluís García de Benito (xiblateru de Lliberdón) o Fernardo Rubio (Gaiteru de Dixebra), y que como nos vieyos tiempos van tar esti miércoles nel Trisquel de Xixón. Xunta ellos, munchos son los músicos que pasaron per "Merlín" compartiendo y disfrutando del espíritu del folk que defende esti grupu, qu'interpreta versiones de melodíes tradicionales, sobre tou de los países célticos.

Otra opción pa sentir música en directo esti miércoles ye la qu'ufierta'l Ca Beleño de Xixón. Ellí va actuar "Tuenda", que ye'l nome col que se presenta'l tríu formáu por Xosé Antón "Ambás" (cantante y gaiteru de "N'Arba"), Pepín de Muñalén (xiblateru de "La Bandina'l Tombo") y Elías García (bouzouki de "Llan de Cubel"). Esta formación yá actuó va dellos meses en Xixón con munchu ésitu nel ciclu "Folk de Cámara", del qu'informáremos puntualmente dende Asturies.com. El grupu fai un repás a un repertoriu tradicional hasta agora inéditu recoyíu pol cantante del grupu, Ambás. Más de venti temes con cantares de cuna, ramos, dances...etc, que permiten facer un viaxe musical per Asturies d'occidente a oriente, acompañaos pol son de la xiblata y del bouzouki. La hora d'entamu ta prevista pa les 22:30 hores.