Concentraciones masives esta mañana

Cerca de 3.00o persones n'Avilés y ente mil y dos mil persones en Xixón participaron nes concentraciones de d'esta mañana en señal de pésame y refuga al atentáu d'ayeri en Madrid. Xunta esto, tolos centros educativos y bien d'empreses asturianes pararon el llabor ente les12 y les 12:15, un cuartu d'hora en que tamién pararon tolos trenes de FEVE. Tres de les concentraciones y paros, esta tarde va ser a les siete la manifestación n'Uviéu, convocada pol Gobiernu d'España al traviés de la Delegación de Gobiernu y pola Xunta Xeneral del Principáu, PSOE, PP, IX-BPA, CCOO, UXT y USO baxo'l lema "Con las víctimas, con la Constitución, por la derrota del terrorismo". P'afayar el treslláu de la manifestación que va salir a les siete de la tarde de la Plaza d'América, Delegación del Gobiernu encamienta a nun garrar el coche particular y emplegar el tresporte públicu, amás d'encamentar a los grupos políticos que nun lleven insignies nin pancartes colos sos símbolos.

En Xixón, los autobuses van circular de baldre esta tarde ente les cinco y les seyes pa llevar a la xente hasta la estación de tren, onde va haber trenes de cercaníes pa dir hasta Uviéu. Ayuntamientos de tan llonxe como Cangas del Narcea tamién van poner autocares de baldre, mientres qu'Avilés va pesllar tolos edificios municipales y suspender toles actividaes. Uviéu, Xixón, Avilés, Corvera y Cangas del Narcea ente otros conceyos aprebaron esta mañana declaraciones contra l'atentáu, mientres que'l Presidente Asturianu fizo una declaración oficial de condena y llamando a dir a la manifestación