Compromisu va solicitar a la Fiscalía qu’actúe d’oficiu pola desapaición de 500.000 tonelaes de carbón

La desapaición de 500.000 tonelaes de carbón nel Almacén Estratéxicu Temporal d’HUNOSA lleva a Compromisu por Asturies a solicitar a la Fiscalía qu’actúe d’oficiu pa esclariar esti asuntu. Nun descarta presentar una denuncia.

La federación de partíos cree que l'alarma social y el desconciertu que provoca esta situación, “inesplicada ya inesplicable”, xustifiquen la presentación d’un escritu a la Fiscalía nel que se pide qu’actúe d’oficiu. "Tamos falando de la desapaición de 500.000 tonelaes de carbón, o lo que ye lo mesmo, de 65.000.000 d'euros qu'afecten a una empresa pública y sobre la que naide ta dando nin  pidiendo esplicaciones convincentes”, apunta Yolanda Huergo, vocera de Compromisu por Asturies, que’l sábadu anunció que nun descarta presentar una denuncia, mesma midida que Foro de Ciudadanos fixo pública güei.

Huergo considera que les informaciones últimes, que señalaben qu’había 648.000 tonelaes, anque fuera del depósitu, “lloñe de clarificar lo que pasó realmente, vien a introducir inda más elementos d'incertidume nesta situación que yá de por sí, resulta inesplicable dafechu”. “Con independencia de les investigaciones que puedan tar faciéndose per parte de l'Abogacía del Estáu o de la mesma HUNOSA, hai nicios más que suficientes que xustifiquen la intervención d'oficiu de la Fiscalía", añade la vocera de Compromisu, qu’encamienta "a toles partes a esclariar d'una vegada y de forma convincente qué ye lo que pasó con estos 65.000.000 d'euros, máxime cuando'l Ministru d'Industria, Enerxía y Turismu, Jose Manuel Soria, acaba de confirmar  lo que yá se sabía: qu'esta ye una de la razones que caltién bloquiáu'l pagu de les ayudes empresariales del 2012”.