Como-y afecta a Asturies l'ampliación de la UE

El nuevu panorama européu deriváu de la entrada a la UE de los países del Este va ser bien distintu al d'anguaño, polo menos no que se refier a la distribución de los fondos europeos. Asturies ye una de les rexones que reciben ayudes de Bruseles por nun llegar al 75% de la renta media de la UE, pero l'efectu estadísticu va facenos más ricos a los asturianos en comparanza con otres rexones de los candidatos a l'ampliación. Con ello, Asturies perdería, xunta otres comunidaes la condición de "oxetivu 1"

Sobre esti asuntu, na Xunión Europea hai anguaño dos posiciones bien estremaes: la de los grandes países como Alemaña, Francia y Gran Bretaña que nun quieren da-yos más perres a estes rexones y la de los países como Grecia o Portugal que necesiten más fondos p'algamar un nivel de vida asemeyáu al de los primeros. Asina, los grandes de la Xunión proponen baxar la so contribución n'ayudes del 1,24% del PIB que ponen agora al 1%. Contra esto, la Comisión Europea refuga esa propuesta y defende una xuba de los fondos de cohesión pal periodu 2007-2013.

Nestes selmanes la Comisión Europea ta trabayando na propuesta del presupuestu pol que va mandase la entrada de los nuevos países, y el nuevu repartu de fondos europeos que sal nella nun pinta gota bien p'Asturies. Según el documentu, les rexones europees que dexen de ser Oxetivu 1 van ver como-yos mengüen les ayudes de Bruseles, anque se cambie a otra categoría d'ayudes transitories , la nueva "1bis". Tres de les "1 bis" la UE caltién la categoría "oxetivu 2" pero les rexones enxertes nesta categoría tienen namás el 20% del presupuestu de fondos de cohesión, mientres que los oxetivos 1 lleven el 80%. Otru cambéu importante na financiación de la UE, anque non rellacionáu directamente col tema de les ayudes estructurales, ye que los fondos pa l'agricultura (PAC) que comen más de la metada del presupuestu comunitariu, van tener una baxa grande.

Les perspectives pal Estáu Español nestos presupuestos son mui probetayes ya que se perderíen el 40% de les ayudes nel curtiu plazu, lo que supón 21.738 millones d'euros. Según los cálculos de la Dirección de Política Rexonal, órganu dependiente de la Comisión Europea, l'Estáu Español va ser el más va dexar de recaudar de Bruseles, y ye qu'España, qu'hasta agora taba nel 84,2% de la renta comunitaria, va pasar a un índiz del 92,4%, y Asturies nun va ser ayena a esti efectu estadísticu. Dientro del Estáu les Comunidaes Autónomes de Valencia, Canaries y Castiella - Lleón van ser les primeres que lo noten, y van dexar de recibir ayudes a partir del añu 2007. Mentanto qu'Asturies, xunta Ceuta, Melilla y Murcia van tener un plazu d'adaptación per fases. Asina, nel 2007 van recibise'l 85% de les ayudes, menguando'l porcentaxe a razón del 5% al añu d'entós en p'alantre hasta llegar al 2.013, en que quedaríemos col 55%. Puesto en númberos, ello quier dicir qu'Asturies, que ta recibiendo nel periodu 2000 y el 2006 1.800 millones d'euros de los fondos de cohesión,quedaría con una partida total de 1.200 millones pal periodu 2007 - 2013.

Con too y con ello, la comisaria de tresportes y vicepresidenta de la Comisión Europea Loyola de Palacio nun lo ve tan escuro, ya que según diz ella, la perda de fondos europeos del Estáu Español ye méritu de la meyora de la situación económica y non del efectu estadísticu. Ye dicir que la economía va tan bien que l'Estáu va medrar nun par d'años lo que nun medró nos cuatro últimos. Ello ye que'l recorte de fondos europeos ye p'Asturies muncho más importante que tolos modelos criticaos pol PP de replantegamientu de financiación del estáu. Ensin dulda, les ayudes europees tienen fecha de vencimientu n'Asturies, anque los númberos finales del repartu van conocese esti miércoles, cuando la Comisión espublice'l tercer informe de cohesión na UE.