Como pasó'l 2.003 el campu asturianu

Ensin dulda, el campu asturianu foi ún de los sectores más dañaos a lo llargo d'estos 12 meses, y d'ello dimos anuncia dende Asturies.com. Na cuestión llaboral, la reconversión masivo llevó esti añu a más profesionales a acoyese a los planes d'abandonu de la esplotación a más d'ochocientos ganaderos, y nun hai renuevu xeneracional que garre la xestión de les esplotaciones. D'otra manera, la entrada del nuevu decretu que regula la cuota llechera, la competencia del lleche negro y la baxada de preciu del lleche impuesta pola industria llevó a los ganaderos a protestes desesperaes, como la del 25 d'abril, cuando regalaron 3.000 llitros de lleche a la xente que pasaba pela cai n'Uviéu. El nuevu decretu qu'apauta la cuota llechera y que ta sacando fuera d'Asturies más de 12 millones de llitros de cuota de producción.... ello mientres sectores complementarios como'l de l'agricultura y ganadería ecolóxiques siguen ensin desconsoñar y cuando la reforma de la Política Agraria de la UE yá tien fecha d'aplicación, l'ún de xineru de 2.006, un añu que pue suponer l'entamu d'una etapa distinta p'Asturies, en cuantes que tamién va ser l'añu en que dexemos de ser "oxetivu 1" pa la UE.

Nun ye un resume bonu, y asina lo entiende'l sindicatu agrariu COAG, que ta acabante d'espublizar una memoria 2.003 na qu'asegura que'l futuru agrariu y rural tan amenazaos dafechu. Nel sector de vacunu de lleche, COAG diz que esti añu pasose de 5.462 esplotaciones n'abril a 5.022 en setiembre, ello ensin contar otres 314 ganaderíes que yá tienen solicitao l'abandonu de l'actividá. Énte esta situación, el sindicatu denuncia la impasibilidá de l'alministración na competencia de la lleche illegal producío fuera de cuota y que fuerza una baxada de los precios al productor, que vien de vegaes pide l'abandonu de l'actividá al entrar en númberos encarnaos. Pa más aquello, la baxada de precios nun repercute nel consumidor, en cuantes que'l preciu del lleche "y d´otros productos que dicen que son lleche" lleva tol añu xubiendo.

En ganao de carne, la organización que dirixe Marino Fernández diz que,anque echó a andar la IXP "Ternera de Asturias" la marca nun ta potenciándose como debiere dende l'alministración, notándose esto sobremanera na falta de campañes de propaganda y nel etiquetao defectuosu de los productos acoyíos a la IXP. Los daños al ganao por animales en zones de montaña tamién son otra quexa denunciada pol sindicatu, que tamién reparte pa l'alministración central por obligar a tener el "certificáu veterinariu" documentu caru y que nel que nun s'enfoten porque pue caciplase bien fácil nelli. Nel separtáu de lleis, la normativa nueva sobre arrendamientos rústicos, qu'afala la movilidá de la propiedá del terrén ye una quexa menor énte la gravedá de la desapaición del Réxime Especial Agrariu de la Seguridá Social. Ello ye que, dende pasao mañana, tolos agricultores y ganaderos que se dean d'alta na SS van tener que cotizar por autónomos.