Cómo evitar una inspección fiscal

Ya queden pocos díis pal fin del plazu del Impuestu sobre la Renta de les Persones Físiques (IRPF). Esti impuestu tien alloriada a della xente porque la "xusticia tributario" plantega situaciones tan paradóxiques como'l que una persona con menos ingresos pero con más d´un contratu llaboral al añu tenga que paga-y a l´Alministración una mozada de de perres más qu'un trabayador con un solu contratu al añu, qu'icluso delles veces, y hasta ganando más perres que´l primeru, nun tien obligación de facer la declaración.

Si yá de mano vemos que la renta tien bien de coses curioses, nun ye menos verdá que l´impuestu de la renta ye ún de nos que más mentires se ponen. Por poner un casu, la estadística diz qu'hai pisos ensin alquilar a esgaya. En cambiu a la hora de buscar un pisu ye perdifícil polos altos precios de los alquileres. Estos altos precios indiquen que nun sobren munchos pisos vacíos. La conclusión ye evidente, y ye que muncha xente con pisos alquilaos nun tributa por ellos na declaración de la renta.

Nestos tiempos de rompese la testera faciendo númberos pa siguir saliendo a pagar ye perimportante tener presente una serie de conseyos fiscales pa polo menos nun tener la "prestosa" visita d´un Inspector de Facienda. La primer cuestión ye que ante cualesquier dulda debemos acudir a un asesor fiscal o a les ofícines de Facienda. Nun ye mester d'acudir a un collaciu por munchu qu'estudiare u polo llistu que seya. Tampoco ye lo meyor acudir a un bancu, en cuantes que los trabayadores de los bancos nun son espertos en materia fiscal y la esperiencia diz que s'enquivoquen más veces de la cuenta. Dir a un asesor fiscal ye perimportante cuando se tienen ingresos empresariales, cuando nel exerciciu fiscal a tributar se recibió una herencia o donación o tamién nel casu que se vendiese o comprase dalgún bien mobiliariu o inmobiliariu de gran valor monetariu.

Hai un catálogu d'operaciones que sigue mui atentamente la Facienda Pública y poles que se puede entamar una inspección fiscal. Delles operaciones poles que salten les alarmes son el mercar xoyes, coches y viviendes de luxu, invertir en chiringuitos financieros o tener un entramáu de sociedaes mercantiles al to nome -caro qu'esto nun ta al alcance del común de los mortales- Tener un altu consumu de gas, lluz o agua en viviendes que nun conste que tean alquilaes, gastar abondo cola tarxeta de créitu y les tresferencies al estranxeru, especialmente a paraísos fiscales y demás son motivos pa que la AEAT se ponga a investiganos en casu de que ya sospeche daqué

La declaración de la renta ye una preba pa la Facienda Pública onde se puede demostrar que se gasten más perres de les que se ganen o que s'esmucen ingresos que dempués apaecen n'otros llaos. L´Axencia Tributaria cruza munchos datos de munchos sitios polo que´l tiempu xuega a favor de los Inspectores de Facienda. Namái dicir que´l ésitu de los Abogaos del Estáu en casos de fraude fiscal tá penriba´l 80%. Por ello si de verdá se quier polo menos optimizar la declaración de la renta lo meyor ye dir a un bon asesor fiscal.

....Hasta´l prósimu exerciciu fiscal.