Cola fin de la Guerra los inversores marcharon de procesión

La selmana pasada foi positiva pa los mercaos bursátiles nun escenariu en que los datos económicos y la situación de les empreses tomen más fuercia agora que a los inversores ya nun-yos preocupa la situación en Iraq en cuantes que namás-yos interesa la dimensión militar del asuntu. N´España la bolsa portose bien en comparanza cola debilidá del restu de les places europees, anque les fiestes de Selmana Santa ficieron d'esta una selmana con mui pocu volume de negociu. De fechu, el vienres pasáu marcó ún de los mínimos anuales con sólo 700 millones d´euros negociaos nel parqué madrilanu. L´Ibex asistióse nos 6.574,40 puntos con una xuba del 1,1% el vienres pasáu, con una xuba selmanal del 2,05%. Esti datu positivu pon a los mercaos españoles en terrén positivu nesti añu, afitando a la Bolsa de Madrid ente les cabezaleres europees no que cinca a rentabilidá anual. Dientro d´esti ambiente festivu les más de les places europees van pesllar hasta'l martes 22 d´Abril.



Nesta selmana foron los chicharrinos del mercáu madrilanu, los valores de pequeña capitalización, los que tuvieron meyor comportamientu. Jazztel continuó con variaciones polos rumores desmentios de fusión, mentantu los blue chips del mercáu xubieron a la par. Ente los bancos el vienres destacó'l BBVA con una xuba del 2,78% asistiándose nos 9,24 euros aición. El SCH tampoco quedó atrás y xubió'l vienres un 2,04% pa mangase nos 7,01 euros aición. Les constructores FCC y Ferrovial tuvieron xubes penriba´l 2%, y ye que'l sector de la construcción ye onde corren siempre a atechase bien d'inversores que van a lo seguro, anque un valor que pueda tomar importancia pola bona traza ye la inmobiliaria de Banesto, Urbis. Una noticia destacada nesti sector ye la operación de compra de Ferrovial pa mercar la constructora inglesa Amey. Dalgunos analistes nun ven con bonos güeyos esta compra que supón un gran esfuerciu financieru pa Ferrovial, pero la operación los inversores bendiciéronla con fortes xubes. El Grupu Telefónica tuvo un bon fin de selmana con xubes xeneralizaes. TPI, Terra y Telefónica subieron penriba´l 1% mentantu Telefónica Móviles avanzó un 0,61%. Otramiente Rede Eléctrica, NH Hoteles y Acerinox nun tuvieron bon resultáu nel pieslle selmanal y trancaron con perdes.



A dellos inversores siguen sin presta-yos los resultaos empresariales de les empreses más importantes. Esta vegada toco-yos a Apple, AMD y Sun Microsystems que, anque meyoraron previsones los sos resultaos son mui débiles. A la contra Nokia dio-y una bona noticia a los inversores con unos resultaos perpositivos. Los malos datos de desempléu d´Estaos Xuníos emburriaron al Dow Jones a tener abultaes perdes en delles sesiones de la selmana pasada. Les places europees trancaron en positivo con una xuba selmanal del DAX alemán de casi'l 5%.



Selmana de blincos pal euru, que llegó a algamar el cambéu de 1,097 pa trancar el vienres a 1,089 dólares. Una bona xuba pa la moneda europea que se vió favorecida polos febles resultaos de la economía norteamericana. Dempués de la Guerra n'Iraq el euru sigue recuperando terrén. El preciu de barril Brent ya val 25,40 dólares. Destacar el bon comportamientu de la Bolsa de Madrid emburriada por una meyor coyuntura macroeconómica en comparanza con otros países europeos y polos movimientos de fusiones y alquisiciones que tamos viviendo anguaño.