Ciudad de Murcia 3 - Sporting 2

El Sporting dexó en Murcia la plaza d'ascensu que tanto-y costare algamar dempués d'un partíu en que fizo un primer tiempu de llibru y un segundu de pena. Con too y con ello, nel equipu de Marcelino hebo una estrella que rescampló sobre'l restu: Bilic. El croata metió'l primer gol, dio'l segundu y tuvo lo menos otros dos nes botes y na cabeza, anque nun foi a concretalos. L'enemigu, un Murcia que tien una plantilla penriba de los resultaos que lleva nesti entamu de lliga y nel que llama l'atención la presencia del ex-primera división "Turu" Flores.

L'alcuentru tuvo dos partes bien estremaes, una primera en que'l Sporting remanó'l xuegu y foi a adelantase en marcador y una segunda en que los asturianos apigazaron y dexaron que'l rival los comiere, cometiendo errores fatos impropios d'un candidatu al ascensu. Si el gol del empate del Murcia vieno dempués d'una riestra de rechaces nel ária, el segundu salió d'una xugada en que los centrales asturianos dexaron pasar a los murcianos ensin oponer resistencia. La sentencia definitiva púnxola Godino, y anque'l Sporting esconsoñó y marcó per aciu d'Ismael, yá yera tarde. Bilic tuvo una cabera oportunidá p'amarrar un puntu, pero fallola.