Cinco sableres incorpórense a la Rede de Playes ensin Fumu

Ente elles ta la xixonesa de San Llorienzo.

Esti miércoles, 31 de mayu, celébrase'l Día Mundial ensin Tabacu y la Conseyería de Salú aprovechó esta xornada p'anunciar ayeri la incorporación de cinco sableres más a la Rede Asturiana de Playes ensin Fumu. Son, amás de la urbana más popular del país, les de Torbas, Monellos y Riboira, n'El Franco, y La Ñora, en Villaviciosa.

Esti programa, nel que yá participen 27 arenales de 8 conceyos, "promueve una vida llibre de tabacu, previene'l consumu y fomenta'l respetu a les persones y al mediu ambiente". En concreto formen parte del mesmu toles de Castrillón y El Franco, que pasa a tener tola so mariña llibre de fumu depués d'intergrar estes trés sableres esti añu, y la de Penarronda en Castropol; L'Estilleru, La Griega y La Isla, en Colunga; el Sablón, en Sotu'l Barcu; A Ribeiría y As Pantorga, en Tapia; Misiegu, Rodiles (Miami), El Puntal y La Ñora, en Villaviciosa; y San Llorienzo, en Xixón.

El fechu de pertenecer a la Rede de Playes ensin Fumu nun significa que tea prohibío fumar nestes sableres, sinón que supón una recomendación pa los usuarios fundamentada na so salú y nel respetu a los demás.