Chus Pedro vuelve ente ñublu y orpín

Na mañana d'ayeri presentóse "Ente ñublu y orpín" el primer discu en solitariu de Chus Pedro, un trabayu del que vien falándose dende 1999.

El cantante del dúu "Nuberu" Chus Pedro vuelve a ser noticia na música asturiana cola edición del so primer discu ensin Manolo Peñayos "De Ñublu y Orpín" ta editáu por "Fonoastur" y ye una idega que ñació de la que Chus Pedro collaboró nel discu de "Tejedor" Texedores de suaños,. Daquella entamó a faláse de facer un discu onde la voz fuere lo primero y ésta tuviere acompañada por músicos y productores de renome. Pasaron más de cuatro años hasta qu'esa idega inicial se materializó.

El resultáu ye esti "De Ñublu y Orpín", que vivió un procesu mui llargu d'ellaboración. Chus Pedro y l'arreglista del discu, Gabino Antuña, teclista de directu de "Nuberu" buscaron en más de 700 cantares de la tradición asturiana pa topar que temes yeren los que más-yos apetecía grabar. Dempués vieno'l procesu de búsqueda de collaboradores y profesionales que diben participar nel discu. Nun primer momentu falóse de la producción de Phil Cunningan, anque al final nun pudo ser por delles razones. Pero a la fin el discu contó cola collaboración na producción de les mezcles del componente de "Capercaillie" Donald Shaw y Paul Mc Geechan.

Anque hai que valorar esta aportación de xente de fuera, la culpa del resultáu final hai qu'echa-yla principalmente al trabayu de los músicos asturianos. Gabino Antuña ye'l principal productor del discu xunta Donald Shaw, ente ellos amestaron el trabayu de nomes como Diego Pangua, Jose Ángel Hevia, Elias García, Xel Pereda, Fernando Arias, Jose Manuel Tejedor o Javi Méndez. Cantares como "Soi de Verdiciu", "Ecos de la Quintana" o "Yo fui al carmín de la Pola" tan trataes con estilu "atlánticu" como diz Chus Pedro, onde lo acústico ye lo que manda, y les trabayaes igües acaben por sofitar la escelente voz de Chus Pedro.

Na presentación de los locales de la SGAE n'Uviéu'l cantante comentó la intención de llevar esti discu al directu, y a poder ser presentalu nel teatru Campoamor d'Uviéu. Pa esta presentación nun hai fecha, pa lo que si hai fecha ye pa l'actuación de Chus Pedro xunta Jose Manuel Tejedor el 14 de xineru nel Celtic Connection de Glasgow.

Como detalle hai que dicir tamién que Chus Pedro comentó qu'esti discu nun significa'l fin de "Nuberu", si non que son dos proyectos diferentes que tienen vida propio.