Cellagú quedó pa prau

O pa piedres, meyor dicho. Anque'l castru de Cellagú yera ún de los más importantes que s'atoparen n'Asturies y l'únicu en conceyu d'Uviéu, el so futuru taba amenazáu, pol posible recrecíu de la cantera cola que llindaba. La cementera Readymix Asland aneciaba n'enanchar la esplotación, arramplando col castru, pero pa poder facelo necesitaba'l preste de les instituciones. Nestes taba la cosa cuando una nueche de 1997, xente desconocío esfarrapló tolo que pudo del castru, que nun tenía vixilancia. Foi quiciás l'ataque más grande al patrimoniu material asturianu en tola década de los 90. La declaración de Cellagú como Bien d'Interés Cultural yera la única posibilidá de salvar lo que quedaba, pero la historia de Cellagú remató col determín d'anteayeri de la Xunta de Patrimoniu, que -con tres votos en contra- decidió nun da-y al yacimientu la categoría de BIC. Los materiales de Cellagú guardaránse n'otru llugar y dexarase ermu l'allugamientu del castru.Na Xunta Xeneral del Principáu la única protesta vieno d'Izquierda Xunida, qu'asoleyó esti comunicáu. Nelli, la formación d'izquierdes diz qu'afalar la fin de Cellagú abúlta-yos una decisión más política que científica, amás d'un incumplimientu de la Llei de Patrimoniu.N'Asturies.com ofrecémosvos esti artículu sobre Cellagú de l'arqueóloga Gema Adán, espublizáu nel númberu 11 de la revista Asturies, Memoria Encesa d'un País, editada pola Fundación Belenos. Ellí puedes ver un análisis de los trabayos arqueolóxicos nos años 95-96