Celebrose la primer Astur Party

Esta Selmana Santa pasada hebo más aparte de procesiones nes cais y atascos nes carreteres cola celebración en Xixón del Astur Party, un eventu asemeyáu al Campus Party valencianu que ye´l referente de concentraciones lúdiques d´Internet nel Estáu y qu'axunta tolos años a más de 2.000 persones. L'añu pasaú yá s´intentare facer una Campus Party astur, pero les prieses y la falta d´esperiencia de los organizadores xunta la poca publicidá que-y se dio torgaron l'ésitu de la iniciativa, qu'esti añu llevó a términu una nueva organización qu'aconceyó 230 mozos (y namás dalguna moza) d'entre once años a los trentaytantos colos sos propios ordenadores pa participar nel recintu de la Feria Internacional de Muestres de Xixón de la Astur Party.

Los organizadores del Astur Party foron un ciber xixonés, l'asociación cultural "Quinto Pino" y la empresa de telecomunicaciones Netcom, contando amás col patrociniu de Telecable, Pepsi, el mayorista xixonés d´ordenadores Glezal Informática (G.I.), la empresa de routers EarthLink y l'Ayuntamientu de Xixón. La organización movió un retén de sobre 70 persones ente trabayadores y collaboradores.

Ente les actividaes, los xuegos na rede foron la estrella del alcuentru. Chatear y intercambiare ficheros de música y video fueron otres actividaes favorites de los internautes, anque ún de los oxetivos de la xente que participa en xuntes como la del Astur Party ye conocer físicamente a les persones coles que chatea o xuega na rede habitualmente. Tamién ye un foru pa intercambiar opiniones, trucos y too lo rellacionao cola rede de redes. L'entusiasmu de dellos foi tan grande qu'hebo internautes que pasaron nueches enteres ensin dormir, echando pigazos na mesma mesa del ordenador. Tamién hebo actividaes complementaries, con conciertos tolos díes, anque l'acústica falló bastante.