CD Covadonga y Caudal van xugar la final pa xubir a Segunda B

El CD Lealtad torna a cayer na fase d'ascensu tres una Lliga regular inmaculada.

Esti sábadu, a les 19 hores nel Suárez Puerta y otra vegada a puerta zarrada, el CD Covadonga y Caudal, tercer y cuartu clasificaos, van xugar la final pa llevar la plaza que correspuende a Asturies na Segunda División B de la campaña próxima tres les midíes tomaes pola Real Federación Española de Fútbol pa salvar la crisis sanitaria y acabar la temporada. Nel casu d'empate, sería'l conxuntu uvieín el que diera'l saltu de categoría, yá que nun hai prórroga nin penaltis.

El primer choque, antayeri, rexistró la primer sorpresa. El Lealtad, que nun perdió nin un partíu de Lliga nin esta temporada nin l'anterior, volvió a ver frustáu'l sueñu de tornar a la Segunda B na fase d'ascensu.

Si l'añu pasáu foron el Getafe B y el Villarrobledo'l los que dexaron fuera a los maliayos de manera cruel, nesta ocasión el verdugu foi'l Caudal cuando yá acariciaben el pasu de ronda. Robert, con una gran definición a seis minutos de final, daba la victoria a los mierenses nun choque mui igualáu, como se prevía.

Sicasí, el Lealtad, como campeón de Lliga, va tener la oportunidá de competir contra otros primeros que nun algamen l'ascensu por les dos places que queden llibres.

Aciertu nos primeros minutos

Na otra semifinal, celebrada ayeri, el Cova llevó la victoria énte'l Llanera por 2-3 nun partíu que se-y punxo de cara a los de Fermín Álvarez. Nel primer minutu Diego García adelantaba a los azules nel marcador tres un bon control nun balón en llargu y nel 12 Edu Font marcaba'l so primer gol de la tarde.

Recortaba pal Llanera Abel Argüelles pasaos los 20 minutos de partíu, pero otra vuelta Font anotaba cerca del descansu. Na segunda parte los de Posada buscaron l'empate que-yos daba'l pase, pero namái pudo anotar nel 90 Dani González tres un error nun corner del porteru Aitor Rodríguez.

Na imaxe, un ataque del Caudal na primer parte de la primer semifinal.