Cayida del Euru énte les xubes de les Bolses

Presto-y a los inversores los datos macroeconómicos d´Estaos Uníos, asina como la fuercia que ta garrando'l dólar respectu la moneda europea. Perbona traza la de los mercaos internacionales, onde tanto Wall Street como l´Ibex-35 tuvieron xubes na selmana pasada. Na Bolsa de Madrid esta selmana pasada se caracterizóse polos máximos anuales de dellos valores cotizaos.

Nel Vieyu Continente les estadístiques de de la cayida d´un 0,1% del IPC francés y la medra del 0,3% del PIB del Reinu Uníu nun influyeron nos mercaos. Lo que si fizo mercar a los inversores foron los bonos datos macro del otru llau del Atlánticu, como´l descensu de peticiones d´empléu. Les principales places europees tuvieron una selmana plana ensin grandes blincos. Francfort peslló en negativo como Madrid, a la contra París y Llondres que trancáron con febles xubes. Wall Street peslló'l vienres pasáu con una recoyida de beneficios por parte de los inversores. L´índiz Dow Jones trancó'l vienres pasáu nos 9.348,87 puntos con una cayida del 0,79%, mentanto que l´índiz tecnolóxicu Nasdaq baxó un 0,69% pa colocáse nos 993,05 puntos. De fechu ye la segunda selmana consecutiva que Wall Street pieslla en positivo, ante´l entusiasmu de los inversores mui a la escontra del pesimismu de dellos analistes polos febles resultaos económicos.

Selmana plana tamién pa la Bolsa de Madrid que medró un 1,34% nel conxuntu de la selmana pasada. L´índiz xeneral del parqué madrilanu peslló nos 758,30 puntos, tres una xuba selmanal del 1,66%. L´Ibex asitiose nos 7.205,90 puntos con una baxada'l vienres pasáu del 0,12%. Perbona selmana pa Repsol que marcó máximu anual y tamién bona selmana pa Service Point, enantes Picking Pack, con munchu volume de negociu y xuba penriba´l 10%. Otres xubes importantes ente Telepizza, Aceralia, BBVA y Sol Meliá. Nel terrén de les perdes destacaron Corporación Mapfre, Dogi, Banco Popular, SCH y Ferrovial. Bona selmana pal Grupu Telefónica onde la matríz yá cotiza penriba los 10 euros. En xeneral la selmana pasada foi positiva pal sector enerxéticu polos favorables cambeos llexislativos n´Arxentina, país perimportante pa delles empreses cotizaes na bolsa madrilana.

El petroleu sigue con un preciu altu alrodiu los 30 dólares barril. El vienres pasáu'l preciu del oru prietu peslló nos 29,8 dólares barril. Les reserves de petroleu d´Estaos Uníos baxaron otra vegada más, ya que los americanos nun merquen combustible porque consideren que´l preciu anguaño ye mui caru y nun futuru próximu va baxar la cotización del barril. Tamién ye decisivu'l corte de producción d´Arabia Saudí y el retrasu de comercialización del petroleu iraquino. L´euru sigue en cayida llibre ante la fuercia de la moneda norteamericana. La divisa europea mangóse nel pieslle de la selmana pasada nos 1,085 dólares unidá. La recuperanza económica d´Estaos Uníos y la mayor confianza de la comunidá inversora ficieron que la selmana pasada'l dólar tuvieran una xuba del 3%, la mayor nos últimos dos años y mediu. Asina l´euru s´asistia nel nivel más baxu dende abril d´esti añu. Nel mercáu de renta fixa los bonos tuvieron una selmana mui tranquila onde la duda del Estáu Español ta siendo mui bien valorada por dellos analistes financieros internacionales.