Caxastur va decidir sobre la fusión nueva’l 4 de mayu nuna asamblea

Les tres caxes d’aforros que tán preparando un procesu de fusión nuevu tres descartar a CAM van decidir sobre esti proyeutu’l 4 de mayu. Caxastur, Caja Cantabria y Caja de Extremadura van convocar asamblea xeneral.
 
Caxastur, Caja Cantabria y Caja Extremadura presentaron ayeri al Banco de España la reedición de la so integración a tres bandas. Los órganos de gobiernu de les tres entidaes reuniéronse’l vienres p’aprobar, de forma previsible, un proyeutu nuevu de Sistema Institucional de Proteición (SIP) pa cumplir coles esixencies nueves de capitalización establecíes pol Gobiernu estatal y poles que vela l’institutu emisor. Les caxes nun van pidir recursos públicos al Fondu de Reestructuración Ordenada Bancaria (FROB) pa cumplir colos requisitos de solvencia establecíos pol Decretu de Reforzamiento del Sistema Financiero.
 
Agora, la intención de les tres caxes implicaes nesta integración ye que les asamblees del 4 de mayu ratifiquen la propuesta de constitución del SIP y se perfile’l modelu nuevu. Nuna segunda fase, fadríase’l proyeutu de separación d’activos, siempre tres l’aprobación de la fusión nueva.
 
Esta integración, que pa sindicatos como la Corriente Sindical d’Izquierda (CSI) supón una privatización de les caxes d’aforru pa beneficios de los bancos, va contar al final con un volume d’activos de 56.000 millones de euros, de los que Caxastur aportaría les dos terceres partes (38.000 millones); Caja Cantabria, 11.000 millones (19 por cientu); y Caja de Extremadura, 9.000 millones (16 por cientu).