Caxastur va afitando una política d’inversión n’empreses

La Caxa d´Aforros d´Asturies yá tien el 5% de la compañía de gas ENAGAS. Esta participación supón 72 millones d´euros que la caxa asturiana invirtió dientro de la so política de mercar aiciones de delles empreses cotizaes en bolsa. Con esta compra Caxastur ye agora'l segundu accionista d´Enagás, superada namás por Gas Natural, que tien el 40% de la compañía. Xunta Caxastur, la petrolera British Petroleum (BP) tien otru 5% de la empresa gasista. Asina la caxa asturiana amarra'l tener un papel perimportante nel futuru d´Enagás nun intre en que'l sector gasísticu ta viviendo cambios bien señeros.



Ente les principales razones qu´emburriaron a Caxastur a invertir tantes perres en ENAGAS destaquen la rentabilidá por dividendu asina como'l fuerte balance financieru de la compañía. Pero la razón más importante ye la oportunidá de participar nun sector estratéxicu como ye´l del gas, que va a xugar un papel fundamental nos prósimos años. Caxastur ta nel camín de nun quedar atrás y aprovechar el fuerte crecimientu del sector gasísticu



Caxastur ta espardiendo les sos participaciones financieres de va unos meses p'acá como rempuesta a los difíciles momentos que vive el sector bancariu nel Estáu español. La caxa asturiana vien mercando aiciones de delles empreses que coticen en bolsa en busca de rentabilidá, pero tamién en busca de tomar mayor protagonismu nel gobiernu de les grandes empreses del Estáu. Ente les participaciones que tien Caxastur destaquen el 5% de Duro Felguera, el 25% de HidroCantábrico, el 10,97% de Corporación Alimentaria Peñasanta y el 7,32% de la papelera Ence. Amás con esta política inversora entamada ya dende´l segundu semestre del 2002, Caxastur acaba tamién de mercar participaciones mui abultaes en Red Eléctrica Española (REE) onde tien el 0,82% y en Aldeasa. Nesta última empresa Caxastur mercó'l 5% por 15 millones d´euros. Con esta inversión Caxastur
ye´l cuartu accionista d´Aldeasa tres d´Altadis, el fondu d´inversión Bestinver y la SEPI. Aldeasa tien la concesión comercial d´espacios aeroportuarios na Península Ibérica y en dellos países llatinoamericanos. Estes inversiones de la caxa fuera d´Asturies caen tamién fuera del oxetu social que tienen les caxes. Pero nun ye la única caxa que se comporta d'esta manera, yá que´l restu tan faciendo lo mesmo. Los casos más señeros d´emporios industriales son Caja Madrid y la Caixa. Caxastur, que tien una gran estabilidá financiera gracies al caudal d'aforros que-y pon tola población asturiana, ta entrando nuna dinámica cada vegada más especultaiva, xugando a les alts finances mientres los índices de recuperación económica d'Asturies siguen ensin dar señales clares de recuperación y cuando'l desiertu industrial astur
sigue ganando tarrén añu tres añu.