Caxastur presenta'l beneficiu del primer semestre

La Caxa d'Aforros d´Asturies t'acabante de presentar los sos resultaos empresariales del primer semestre d´esti añu. El beneficiu de la entidá algamó los 44,4 millones d´euros lo que supón una xuba del 9,2% respective al mesmu periodu del añu anterior. La contención de gastos, la xuba del volume de negociu y l´ampliación del marxe d´esplotación ficieron posible esta meyora que va dase nun entornu en que les coses pinten mal pal sector financieru por culpa dela baxada de tipos d´interés.



Caxastur medró a esgaya na concesión de créditos, de fondos d´inversión y de pensiones y sobremanera nel sector hipotecariu. La entidá astur concedió nel primer semestre un 14,5% más de préstamos hipotecarios. Per otru lláu, la morosidá baxó hasta´l 0,82% mentantu que l´índiz de cobertura ye del 440%. Los recursos captaos pola caxa asturiana foron de 6.938 millones d´euros. Otramiente, los servicios financieros per teléfonu y per Internet de Caxastur tamién meyoraron abondo, atropando anguaño la entidá 47.653 clientes na rede. La banca electrónica medró alrodiu 35% nesti periodu, lo que diz muncho sobre la bona acoyida de los servicios na rede de la caxa. Asinamesmo, ente teléfonu y Internet, los clientes ficieron más de dos millones d´operaciones bancaries a distancia nel primer semestre del añu.



La Caxa d´Asturies sigue cola so política d´espardimientu pol país con nueves oficines y la instalación de nuevos caxeros automáticos, axuntando anguaño 217 oficines y 417 caxeros automáticos. Pero lo más importante d´esti primer semestre ye la nueva política inversora de Caxastur, que ta garrando participaciones en delles empreses cotizaes na bolsa. Aldeasa, ENAGAS, Red Eléctrica o Hidrocantábrico son dellos casos del xerme de caxa industrial que ta sofitando Caxastur colos aforros de tolos asturianos y asturianes. A la contra, Caxastur pierde más interés cada vegada nes sos participaciones en CAPSA y en Duro Felguera. El tiempu dirá si esta política favorez el crecimientu económicu del país o ye solo una estratexa financiera.