Caxastur entra na constructora OHL

La entidá financiera asturiana ta acabante d´entrar nel capital social de la constructora OHL. La toma de capital de Caxastur fízose al traviés d´un contratu d´intercambiu de capital, lo que se conoz como "equity swap", anque nun s'esclarien les condiciones del intercambiu . L´oxetivu de la constructora ye algamar un accionariáu estable con una participación destacada de les entidaes financieres. Amás de Caxastur en OHL tamién tienen participaciones fuertes Banco Guipuzcoano, Banesto, JP Morgan y Citibank. OHL ye la constructora del empresariu Villar Mir, el mesmu qu'intentó ensin ésitu facese col control de la eléctrica asturiana Hidrocantábrico. Esta entrada en OHL enxértase dientro del proyectu d´invertir n'empreses cotizaes na Bolsa ya que la constructora de Villar Mir tá nel parqué madrilanu.

Asina, Caxastur continúa cola política de xuba de la inversión financiero y empresarial. Xunta la inversión en OHL la caxa d´aforros tien una abultada presencia nes empreses Hidrocantábrico, Red Eléctrica, Enagás, Aldeasa, CAPSA y Duro Felguera.