Caxastur entama un nuevu ciclu de cine

La Obra Social y Cultural de Caxastur entama esta tarde les proyecciones del ciclu "Ánxeles cayíos" qu'incluye cinco películes de másima actualidá que nun pasaron pelos circuitos comerciales.

Ente elles ta la cinta de Michael Winterbottom "Nine Songs" qu'armó un bon espolín de la que se pasó en Festival de Donostia poles escenes de sexu esplícitu que tien.

José Luis Cienfuegos, director del Festival de Cine de Xixón y responsable de la progranación de los ciclos de cine de Caxastur refirióse a la cinta de Winterbottom como un film que ruempe "los tabúes de la pornografía nel cine" y emponderó'l tratamientu de la imaxe dixital de "Nine songs" pero guardó los mayores eloxos pa "Primavera, veranu, seronda, iviernu... y primavera" película del director coreanu Kim Ki-duk que cuenta una historia iniciática y d'empatía cola vida al traviés de cómo'l pasu de les estaciones inflúi na vida d'unos monxos.

La danesa "La Herencia" que fai un retratu cruel de la burguesía nórdica, la comedia "La gran seducción" na qu'un pueblu enteru intenta afalagar a un médicu pa que quede a vivir con ellos, la cinta d'acción francesa "llee nos mios llabios" y la última de Michael Haneke "El tiempu del llobu" que trata del comportamientu humanu en situaciones sacaes de quiciu completen esti programa de cine.

El calandariu de proyecciones pa estes películes pue consultase na Guía d'ociu Asturiactiva