Caxa Rural, la banca a l'antigua

La primer cooperativa de créitu astur medró'l 2,4% nel primer trimestre d´esti añu. Nesti tiempu, Caxa Rural d´Asturies algamó un beneficu de 5,42 millones d´euros, lo que ye un 2,4% de xuba respective al 2001. Esta xuba espeya'l bon comportamientu de toles partes del so balance, según la entidá. N'acabando marzu, los depósitos de la cooperativa de créitu yeren de 1.079,97 millones d´euros, un 12% más en comparanza col 2001. Nesti períodu Caxa Rural tuvo unos ingresos totales de negociu bancariu de 13,3 millones d´euros. Tolos márxenes financieros de la entidá xubieron penriba´l 1%, cola morosidá asistiada nel 1,11% de la inversión, mientres que los fondos propios de la cooperativa algamaron los 111,6 millones d´euros. Estos bonos resultaos son gracies al crecimientu de los depósitos y de les hipoteques. Los resultaos de la entidá
son bien discretos en comparanza con los resultaos d´otres caxes, pero la entidá financiera más particular d'Asturies sigue cola política conservadora de nun arriesgar nada.



Anguaño, Caxa Rural d´Asturies ta viviendo un tiempu decisivu pa´l so futuru. Primero, la cooperativa ta dientro d´un procesu de cambéu de plataforma tecnolóxica, y amás ta poniendo oficines nuna estratexa d'espardimientu que nun parez mui racional o que polo menos nun va acordies a lo que faen los demás bancos. Agora mesmo Caxa Rural tien más de 270 emplegaos en cerca de 90 oficines, pero va poco fizose n´Uviéu un procesu de selección pa contratar 25 titulaos universitarios más pa cubrir bona parte de les nueves vacantes de la empresa, que tien l'oxetivu d'algamar les 100 oficines n´Asturies, ello partiendo d'una situación previa de namás 40 oficines. Esti oxetivu ye un enfotu cásique personal del Director de la cooperativa, el Sr. Quirós, quien va retirase d'equí a poco xunta la cúpula de la entidá col so presidente Román a la cabeza.
Los directivos quieren dexar una empresa lider en costante crecimientu dende qu´entamaren la cooperativa con una sola oficina, pero'l crecimientu en presencia y oficines nun va xunta una estratexa de mercáu.



Otramiente la situación ye preocupante pa Caxa Rural en cuantes que'l mediu agrícola y ganaderu yá nun ye rentable, más nun país como Asturies onde el desaniciu del campu ye ablucante. Por eso les caxes rurales tan viviendo un procesu de bancarización, enfotándose nes ciudaes y non nel mediu que-yos correspuende o nel que ñacieron.



Nesti sentíu, la doble estructura de Caxa Rural, que se dixebra en Caxa Rural Asturies y Caxa Rural Xixón tampoco nun ayuda. Esta división, que ñació d'enfrentamientu personal ente les directives de dambes cooperatives, lleva a que les dos Caxes nun se fusionen como-yos manda la lóxica de les sinerxies compartíes y l'aforru de costes. La cosa ye tan especial que les dos tienen un alcuerdu ente caballeros: la caxa de Xixón nun abre oficines fuera de la villa de Xovellanos mientres la Caxa Rural d´Asturies nun se meta en casa d'ellos. El problema ye que Caxa Rural de Xixón nun tien fuercia financiera, y namás tien unes poques oficines na primer ciudá d´Asturies cuando se calcula que en Xixón cabríen guapamente más de venti sucursales pa esplotar el primer mercáu financieru del país. Mentantu Caxa Rural d´Asturies tien que decidir yá sobre´l
so futuru: o marca'l so camín como nel casu de Cajamar y entama a espardese fuera d´Asturies fusionándose con Caxa Rural de Xixón o nun va tener más remediu qu'enxertase nun Grupu español de caxes rurales fusionaes onde s´escaeceríen la identidá y los intereses d´Asturies. Que los nuevos dirixentes seyan profesionales y trabayen pol bien de la entidá. Alea jacta est.