Caxa Rural d´Asturies medró cerca del 10%

La Caxa Rural d´Asturies algamó un resultáu positivu nel primer semestre d´esti añu de 10,52 millones d´euros de beneficios, lo que supón una medra del 9,62%. Toles partíes de la primer cooperativa de créitu astur meyoraron según la propia entidá, poniéndose los márxes d´esplotación, ordinariu y d´intermediación con una xuba penriba´l 10%, y los recursos d´acreedores en 1.123 millones d´euros. Per otru llau, les inversiones con clientes asistiáronse nos 959 millones d´euros, lo que ye una xuba del 22,05%.



Caxa Rural d´Asturies ye la sétima más importante dientro de les caxes rurales del Estáu, y anguaño ta sofriendo perimportantes cambeos cola bancarización del negociu, l´abandonu del entornu rural a favor de les zones urbanes, el fuerte crecimientu de la so rede d´oficines y les importantes inversiones na plataforma tecnolóxica de la entidá. La cooperativa de créitu tien más del 5% del capital social de CAPSA, el conglomeráu alimentariu que controla la Central Llechera Asturiana .