Caveda y Nava recibe a Díaz Merchán

La Fundación Caveda
y Nava, que defende un consensu social a favor de la llingua asturiana, celebra
mañana, 8 de payares, la primer "Xornada de la
Fundación" un eventu que quier facese tolos años y que va
constar de dellos actos rellacionaos col estudiu y homenaxe al idioma
asturianu. En concreto, el programa pa esta primer edición, que va
facese ente'l monesteriu de Valdediós y la Casa de Cultura de
Villaviciosa, incluye la presentación del informe "Llingua
Asturiana: L'estáu de la cuestión 2.003" y una mesa
redonda que, baxo'l títulu "¿Qué oficialidá fai
falta?" va sentar a tres xuristes pa falar sobre los distintos modelos
d'oficialidá posibles pal asturianu y los modelos yá esistentes
polos que tan mandándose otres llingües. Los especialistes que
tienen confirmada la so asistencia van ser Leopoldo Tolivar, l'especialista
n'aranés Alain Viaud y el caderalgu de la Universidá d'Alacant
Josep Ochoa.



Xunta les actividaes de debate y discutiniu, la Fundación que
preside José Luis Atienza tien previstos dos actos solemnes. El primeru
va consistir nun homenaxe al escritor Xosé Caveda y Nava, de quien toma
la Fundación el so nome, mientres que'l segundu va ser l'actu d'entrada
de dos nuevos socios d'honor a la Fundación. Les personalidaes que van
entrar a la Fundación esti añu tienen les dos nome abondu pa sere
noticia elles soles, y ye qu'una d'elles ye'l director del Muséu de
Belles Artes d'Asturies Emilo Marcos Vallaure, mientres que la otra ye
l'antiguu arzobispu d'Uviéu, Gabino Díaz Merchán. El
primeru d'ellos, fundador en 1979 del Muséu de Belles Artes, tien
collaborao en publicaciones de l'Academia de la Llingua y destaca por ser
tamién l'heriede intelectual del desapaecíu cronista oficial
d'Asturies, Joaquín Manzanares. El segundu, arzobispu d'Uviéu
durante cerca de venticinco años, demostró dende'l so cargu tener
una sensibilidá especial pa col tema llingüísticu.